Oil Bucket Challenge: Британиялик механик ўз устидан 30 литр машина мойини қуйди (видео)

Британиялик механик Колин Мейрик Ice Bucket Challenge («Бир челак муздек сув синови») хайрия акциясига ўзгартириш киритишга қарор қилди, дея хабар бермоқда Mirror. У ўз ҳамкасбларидан устидан 30 литр машина мойи қуйишни сўради ва бу акцияни Oil Bucket Challenge («Бир челак ёғ синови») деб атади.

46 ёшли Колин Мейрик ўз видеоролигидан тушган маблағни саратонга қарши кураш бўйича жамғармага ўтказишга ваъда берди. Бу билан у ушбу касалликдан вафот этган онаси хотирасини шарафламоқчи бўлди.

Видео кутилмаганда катта муваффақиятга эришди: у интернетга жойлаштирилганидан бир неча соат ўтиб, механик ҳисобига унинг ҳаракатидан завқланган YouTube фойдаланувчиларидан минг фунтдан ортиқ маблағ келиб тушди.

АLS Ice Bucket Challenge акцияси ташкилотчиларининг айтишича, айни пайтда улар 100 миллион долларга яқин пул тўплаган ва уларни асаб тизимининг камёб касалликлари билан курашишга йўналтирган.