AQSh prezidenti Barak Obama 3-sentabr, chorshanba kuni ertalab bir kunlik tashrif bilan Tallinga yetib keldi. U yerda Obama Estoniya, Latviya va Litva rahbarlari bilan uchrashadi, deya xabar bermoqda “RIA Novosti”.
Air Force One prezident samolyoti mahalliy vaqt bilan 06:22 da (Toshkent vaqti bilan 08:22 da) qo‘ndi. Aeroportda uni Estoniya tashqi ishlar vaziri Urmas Paet kutib oldi. 20 ta mashinadan iborat prezident korteji aeroportdan chiqib, Tallin markazidagi Swissotel mehmonxonasiga yo‘l oldi.
AQSh prezidenti tashrifining rasmiy qismi Estoniya rahbari Toomas Xendrik Ilves bilan Kadriorg bog‘i saroyidagi uchrashuv bilan boshlanadi. So‘ng Obama hukumat qarorgohiga borib, mamlakat bosh vaziri Taavi Riyvas bilan suhbatlashadi.
Shundan so‘nggina Obamaning Estoniya, Latviya va Litva prezidentlari Toomas Xendrik Ilves, Andris Berzinsh va Dalya Gribauskayte bilan umumiy uchrashuvi bo‘lib o‘tadi. Prezidentlar matbuot uchun birgalikda bayonot beradi.
Estoniyaga tashrif davomida Barak Obama shuningdek Nordea konsert zalida nutq so‘zlaydi. Mamlakatni tark etishdan avval, Amerika prezidenti bosh vazir bilan birgalikda 173-AQSh havo-desant brigadasining estoniyalik va amerikalik harbiy xizmatchilari bilan uchrashadi. Ular ayni paytda Tallin yaqinidagi Emari aviabazasiga joylashgan. Kunning ikkinchi yarmida esa Obama Uelsga NATO sammitida qatnashish uchun uchib ketadi.
Izoh (0)