Alisher Navoiy nomidagi O‘zbekiston Milliy bog‘ida O‘zbekiston Respublikasi davlat mustaqilligining 23-yilligiga bag‘ishlangan bayram tantanasi bo‘lib o‘tdi. Bu haqda O‘zbekiston Milliy axborot agentligi xabar bermoqda.
Tadbirni O‘zbekiston Respublikasi Prezidenti Islom Karimov ochib berib, mustaqillik yillarida barcha sohalarda erishib kelinayotgan yutuqlar va taraqqiyot ko‘rsatkichlarini qayd etdi.
Prezident tomonidan ishlab chiqilgan taraqqiyot tamoyillari — “o‘zbek modeli” asosida siyosiy, iqtisodiy va ijtimoiy islohotlar hayotga tatbiq etilmoqda. Islohotlarning bosqichma-bosqich amalga oshirilishi yuzaga kelishi mumkin bo‘lgan iqtisodiy va ijtimoiy bo‘hronlarning oldini olib, islohotlar samaradorligini ta’minlamoqda.
Fuqarolar o‘zini o‘zi boshqarish organlari hududdagi muhim masalalarni hal etmoqda. Mahalliy boshqaruv organlari faoliyati ustidan jamoatchilik nazorati olib borilmoqda. Mahallada tom ma’nodagi demokratik qadriyatlar rivojlanmoqda.
Samarqand, Buxoro, Xiva, Shahrisabz, Qarshi, Termiz, Toshkent, Marg‘ilon singari qadim va muazzam shaharlar yubileyi xalqaro miqyosda tantana qilindi. “Avesto”ning 2700-yilligi, “Alpomish”ning 1000-yilligi, Xorazm Ma’mun akademiyasining 1000-yilligini nishonlash asnosida O‘zbekiston tarixi yanada teran o‘rganildi, shaharsozlik, madaniyat ildizlari tadqiq etildi.
Mustaqillik yillarida Islom Karimov rahnamoligida bolalarning sog‘lom tug‘ilishi va barkamol ulg‘ayishi uchun barcha sharoit yaratildi. Onalik va bolalikni muhofaza qilish, ijtimoiy himoyani kuchaytirish, ta’lim tizimini takomillashtirish, bolalar sportini rivojlantirish kabi sohalardagi islohotlar o‘zaro uzviylik kasb etib, izchil amalga oshirildi.
Qat’iy siyosati va ezgu tashabbuslari sabab O‘zbekistonning jahon hamjamiyatidagi obro‘-e’tibori tobora oshib bormoqda. Eng rivojlangan davlatlar, dunyoga dong‘i ketgan firma va kompaniyalar O‘zbekiston bilan hamkorlikka intilmoqda.
Bugun O‘zbekiston 130 dan ortiq davlat bilan diplomatik munosabatlar o‘rnatgan. Toshkentda 45 mamlakatning elchixonasi, yigirmaga yaqin xalqaro tashkilot va moliyaviy muassasa vakolatxonalari faoliyat ko‘rsatmoqda. Xorijiy davlatlarda, xalqaro tashkilotlar huzurida O‘zbekistonning 50 ga yaqin diplomatik va konsullik vakolatxonasi ochilgan. Mamlakatimiz BMT, ShHT, MDH, Islom konferensiyasi tashkiloti kabi nufuzli xalqaro va mintaqaviy tuzilmalarga a’zo.
Islom Karimov tomonidan avtomobilsozlik, motorsozlik zavodlariga, neft va gazni qayta ishlash, zamonaviy maishiy texnikalar, komputer va mobil telefonlar ishlab chiqarish kabi yangi sanoat tarmoqlariga asos solindi. Oziq-ovqat, yengil sanoat, kimyo, qurilish materiallari sanoati korxonalari modernizatsiya qilindi. Bugun ularda tayyorlangan mahsulotlar aholi ehtiyojini to‘la ta’minlab, dunyo bozorlarini ham zabt etmoqda.
Yaqinda Mustaqil Davlatlar Hamdo‘stligi davlatlararo statistika qo‘mitasi mintaqa mamlakatlarining 2014-yil birinchi yarim yilligidagi rivojlanish ko‘rsatkichlarini e’lon qildi. Unga ko‘ra, O‘zbekiston sanoat mahsulotlari ishlab chiqarish bo‘yicha MDHda birinchi o‘rinni egalladi.
Bundan atigi 23 yil oldin O‘zbekiston ushbu mintaqada ayni shu ko‘rsatkichlar bo‘yicha eng oxirgi o‘rinlarda turardi. Prezident rahnamoligida iqtisodiyot tarkibi tubdan o‘zgartirilgani, sanoat rivojiga alohida e’tibor qaratilgani samarasida O‘zbekiston bu sohada ham birinchilar safiga chiqib oldi.
Turli islohotlar samarasida istiqlol yillarida O‘zbekiston iqtisodiyoti qariyb besh karra o‘sdi. Aholi daromadlari jon boshiga 8,7 barobar ko‘paydi. Keyingi o‘n yilda O‘zbekiston yalpi ichki mahsulotining o‘sish sur’ati sakkiz foizdan oshdi. Joriy yilning birinchi yarmida bu ko‘rsatkich 8,1 foizni tashkil etdi.
Erishilgan natijalar bilan cheklanmasdan, iqtisodiyotni yanada rivojlantirishning qo‘shimcha imkoniyatlari izlanmoqda. 2013-yil 22-noyabr kuni poytaxtda Osiyo quyosh energiyasi forumining oltinchi yig‘ilishi o‘tkazildi. Xalqaro energetika agentligi, Birlashgan Millatlar Tashkilotining Sanoatni rivojlantirish tashkiloti, Islom taraqqiyot banki va boshqa xalqaro tuzilmalar vakillari, soha mutaxassislari va olimlar ishtirok etgan anjumanda mamlakatimizda quyosh energetikasini rivojlantirish istiqbollari belgilab olindi.
O‘zbekistonning har bir go‘shasida ulkan bunyodkorlik ishlari amalga oshirilmoqda. Dunyo miqyosida ham noyob sanalgan yirik zavodlar, sanoat korxonalari ishga tushirilmoqda.
Prezident tashabbusi bilan O‘zbekiston shaharlari bosh reja asosida qayta qurilmoqda. Buni Samarqand, Buxoro, Andijon, Namangan, Termiz, Qarshi, Urganch, Nukus, Farg‘ona kabi shaharlar misolida ko‘rish mumkin: ushbu shaharlar qiyofasi butunlay o‘zgardi, ijtimoiy infratuzilma rivojlandi.
Madaniyat va san’at saroylari, sog‘liqni saqlash, ta’lim, sport muassasalari, xizmat ko‘rsatish va servis shoxobchalari, dam olish maskanlari hududlar ko‘rkiga ko‘rk qo‘shdi.
Qishloqlarda barpo etilayotgan zamonaviy uylar oilalar farovonligini yuksaltirmoqda. Mustaqillik bayrami arafasida minglab ana shunday yangi uy-joylar o‘z egalariga topshirildi.
O‘zbekistonda transport infratuzilmasi izchil rivojlanmoqda. Yangi yo‘llar, yo‘l o‘tkazgichlar bunyod etilmoqda. O‘zbekiston hududlari yagona temir yo‘l tarmog‘iga bog‘lanmoqda. 2013-yilda ulkan strategik ahamiyatga ega yana bir yangi yo‘l — Angren-Pop temir yo‘li qurilishi boshlandi. 124 kilometrlik mazkur temir yo‘l, shu jumladan, 19 kilometrlik tunnel O‘zbekistonning markaziy qismini Farg‘ona vodiysi bilan bog‘laydi, Sharqiy Osiyo mamlakatlarining G‘arb davlatlariga chiqishida muhim bo‘g‘in bo‘lib xizmat qiladi.
Qishloq xo‘jaligida amalga oshirilgan tub islohotlar, fermerlik harakatining samaradorligi tufayli oziq-ovqat mahsulotlari yetishtirish yildan-yilga ko‘payib bormoqda. Sabzavot, kartoshka, poliz ekinlari, meva, uzum yetishtirish, meva-sabzavot mahsulotlarini qayta ishlash hajmi oshib boryapti.
Joriy yilning 6-iyunida poytaxtda bo‘lib o‘tgan “O‘zbekistonda oziq-ovqat dasturini amalga oshirishning muhim zaxiralari” mavzusidagi xalqaro konferensiyada qatnashgan xorijlik mutaxassislar va ishbilarmonlar buni yana bir bor e’tirof etdi, O‘zbekiston erishgan yutuqlarni tan oldi.
Bu yil dehqonlar sakkiz million 50 ming tonnalik yuksak xirmon bunyod etdi. Mustaqillikkacha don va un ta’minoti bo‘yicha boshqalarga qaram bo‘lib kelgan xalq ayni paytda o‘z ehtiyojini ta’minlash bilan birga, xorijiy davlatlarga don eksport qilmoqda. G‘allachilik rivoji chorvachilik va parrandachilik kabi boshqa ko‘plab tarmoqlarga ham ijobiy ta’sir etib, go‘sht, sut, tuxum kabi oziq-ovqat mahsulotlarining mo‘l bo‘lishini ta’minlamoqda.
Izoh (0)