O‘zbekiston Respublikasi Prezidenti Islom Karimov 29-avgust kuni Toshkent shahrida amalga oshirilayotgan qurilish-obodonlashtirish ishlari bilan tanishdi, deya xabar berdi O‘zA.
Prezident Shayxontohur tumanining Abdulla Qodiriy va Labzak ko‘chalari kesishgan chorrahada bunyod etilgan yangi zamonaviy ko‘prikni borib ko‘rdi. “O‘zbekiston temir yo‘llari” davlat aksiyadorlik temir yo‘l kompaniyasi huzuridagi “13-ko‘prikqurilish” tresti bunyodkorlari tomonidan barpo etilgan ushbu transport bog‘lamasi avtomobillarning harakatlanishi uchun keng qulaylik yaratadi. Ko‘prikning uzunligi 642, eni 19 metr.
Islom Karimov mazkur hududda amalga oshirilgan bunyodkorlik ishlari bilan tanishar ekan, ushbu ko‘prikda yilning to‘rt faslida ham transport vositalarining bemalol harakatlanishi uchun muhandislik-kommunikatsiya infratuzilmalarini yanada takomillashtirish, zamonaviy landshaft dizayni asosida obodonlashtirilgan hududlarni ko‘paytirish yuzasidan ko‘rsatmalar berdi.
Prezident Abdulla Qodiriy ko‘chasini kengaytirib, sakkiz tasmali yo‘lga aylantirish, mazkur hududdagi ko‘p qavatli uylarda yashayotgan aholining dam olishi uchun imkoniyat yaratish, mo‘tadil iqlimni ta’minlash maqsadida favvoralar bunyod etish kerakligini ta’kidladi.
Davlat rahbari Olmazor va Shayxontohur tumanlarida qurilgan yangi yo‘lni ham borib ko‘rdi.
5,1 kilometrlik bu yo‘l Olmazor tumanidagi Beruniy ko‘chasidan boshlanib, Shayxontohur tumanidagi Xurshid ko‘chasiga qadar davom etadi. Forobiy, Sag‘bon, Qorasaroy, Sebzor va Labzak kabi katta ko‘chalarni o‘zaro bog‘laydi.
Shuningdek, Islom Karimov Toshkentda barpo etilgan shaxmat bo‘yicha ixtisoslashtirilgan respublika bolalar va o‘smirlar sport maktabida amalga oshirilgan ishlar bilan tanishdi.
Prezident maktabda saboq oladigan o‘g‘il-qizlarning shaxmat bo‘yicha mahoratini oshirish, ularning erkin ijod qilishi uchun yanada qulay sharoit yaratish borasida zarur tavsiyalar bildirdi. Ushbu bino yonida xalqaro miqyosdagi yirik musobaqalar o‘tkazishga mo‘ljallangan, milliy ruh aks etgan yangi inshoot barpo etish lozimligini qayd etdi.
Davlat rahbari O‘zbekiston Respublikasi Prezidenti huzuridagi Davlat boshqaruvi akademiyasining yangi binosini borib ko‘rdi.
Prezident tashabbusi bilan Davlat boshqaruvi akademiyasi binosi zamonaviy me’morlik va texnologik talablarga muvofiq to‘liq rekonstruksiya qilindi.
Islom Karimov akademiya binosi, u yerdagi konferensiya zallari, Axborot-resurs markazida yaratilgan shart-sharoitlar bilan tanishib, bu yerdagi ilmiy, amaliy va tashkiliy muhitni yanada takomillashtirish bo‘yicha zarur tavsiyalar berdi.
Izoh (0)