Алишер Навоий номидаги Ўзбекистон Миллий боғида Ўзбекистон Республикаси давлат мустақиллигининг 23 йиллигига бағишланган байрам тантанаси бўлиб ўтди. Бу ҳақда Ўзбекистон Миллий ахборот агентлиги хабар бермоқда.
Тадбирни Ўзбекистон Республикаси Президенти Ислом Каримов очиб бериб, мустақиллик йилларида барча соҳаларда эришиб келинаётган ютуқлар ва тараққиёт кўрсаткичларини қайд этди.
Президент томонидан ишлаб чиқилган тараққиёт тамойиллари — «ўзбек модели» асосида сиёсий, иқтисодий ва ижтимоий ислоҳотлар ҳаётга татбиқ этилмоқда. Ислоҳотларнинг босқичма-босқич амалга оширилиши юзага келиши мумкин бўлган иқтисодий ва ижтимоий бўҳронларнинг олдини олиб, ислоҳотлар самарадорлигини таъминламоқда.
Фуқаролар ўзини ўзи бошқариш органлари ҳудуддаги муҳим масалаларни ҳал этмоқда. Маҳаллий бошқарув органлари фаолияти устидан жамоатчилик назорати олиб борилмоқда. Маҳаллада том маънодаги демократик қадриятлар ривожланмоқда.
Самарқанд, Бухоро, Хива, Шаҳрисабз, Қарши, Термиз, Тошкент, Марғилон сингари қадим ва муаззам шаҳарлар юбилейи халқаро миқёсда тантана қилинди. «Авесто»нинг 2700 йиллиги, «Алпомиш»нинг 1000 йиллиги, Хоразм Маъмун академиясининг 1000 йиллигини нишонлаш асносида Ўзбекистон тарихи янада теран ўрганилди, шаҳарсозлик, маданият илдизлари тадқиқ этилди.
Мустақиллик йилларида Ислом Каримов раҳнамолигида болаларнинг соғлом туғилиши ва баркамол улғайиши учун барча шароит яратилди. Оналик ва болаликни муҳофаза қилиш, ижтимоий ҳимояни кучайтириш, таълим тизимини такомиллаштириш, болалар спортини ривожлантириш каби соҳалардаги ислоҳотлар ўзаро узвийлик касб этиб, изчил амалга оширилди.
Қатъий сиёсати ва эзгу ташаббуслари сабаб Ўзбекистоннинг жаҳон ҳамжамиятидаги обрў-эътибори тобора ошиб бормоқда. Энг ривожланган давлатлар, дунёга донғи кетган фирма ва компаниялар Ўзбекистон билан ҳамкорликка интилмоқда.
Бугун Ўзбекистон 130 дан ортиқ давлат билан дипломатик муносабатлар ўрнатган. Тошкентда 45 мамлакатнинг элчихонаси, йигирмага яқин халқаро ташкилот ва молиявий муассаса ваколатхоналари фаолият кўрсатмоқда. Хорижий давлатларда, халқаро ташкилотлар ҳузурида Ўзбекистоннинг 50 га яқин дипломатик ва консуллик ваколатхонаси очилган. Мамлакатимиз БМТ, ШҲТ, МДҲ, Ислом конференцияси ташкилоти каби нуфузли халқаро ва минтақавий тузилмаларга аъзо.
Ислом Каримов томонидан автомобилсозлик, моторсозлик заводларига, нефть ва газни қайта ишлаш, замонавий маиший техникалар, компутер ва мобил телефонлар ишлаб чиқариш каби янги саноат тармоқларига асос солинди. Озиқ-овқат, енгил саноат, кимё, қурилиш материаллари саноати корхоналари модернизация қилинди. Бугун уларда тайёрланган маҳсулотлар аҳоли эҳтиёжини тўла таъминлаб, дунё бозорларини ҳам забт этмоқда.
Яқинда Мустақил Давлатлар Ҳамдўстлиги давлатлараро статистика қўмитаси минтақа мамлакатларининг 2014 йил биринчи ярим йиллигидаги ривожланиш кўрсаткичларини эълон қилди. Унга кўра, Ўзбекистон саноат маҳсулотлари ишлаб чиқариш бўйича МДҲда биринчи ўринни эгаллади.
Бундан атиги 23 йил олдин Ўзбекистон ушбу минтақада айни шу кўрсаткичлар бўйича энг охирги ўринларда турарди. Президент раҳнамолигида иқтисодиёт таркиби тубдан ўзгартирилгани, саноат ривожига алоҳида эътибор қаратилгани самарасида Ўзбекистон бу соҳада ҳам биринчилар сафига чиқиб олди.
Турли ислоҳотлар самарасида истиқлол йилларида Ўзбекистон иқтисодиёти қарийб беш карра ўсди. Аҳоли даромадлари жон бошига 8,7 баробар кўпайди. Кейинги ўн йилда Ўзбекистон ялпи ички маҳсулотининг ўсиш суръати саккиз фоиздан ошди. Жорий йилнинг биринчи ярмида бу кўрсаткич 8,1 фоизни ташкил этди.
Эришилган натижалар билан чекланмасдан, иқтисодиётни янада ривожлантиришнинг қўшимча имкониятлари изланмоқда. 2013 йил 22 ноябрь куни пойтахтда Осиё қуёш энергияси форумининг олтинчи йиғилиши ўтказилди. Халқаро энергетика агентлиги, Бирлашган Миллатлар Ташкилотининг Саноатни ривожлантириш ташкилоти, Ислом тараққиёт банки ва бошқа халқаро тузилмалар вакиллари, соҳа мутахассислари ва олимлар иштирок этган анжуманда мамлакатимизда қуёш энергетикасини ривожлантириш истиқболлари белгилаб олинди.
Ўзбекистоннинг ҳар бир гўшасида улкан бунёдкорлик ишлари амалга оширилмоқда. Дунё миқёсида ҳам ноёб саналган йирик заводлар, саноат корхоналари ишга туширилмоқда.
Президент ташаббуси билан Ўзбекистон шаҳарлари бош режа асосида қайта қурилмоқда. Буни Самарқанд, Бухоро, Андижон, Наманган, Термиз, Қарши, Урганч, Нукус, Фарғона каби шаҳарлар мисолида кўриш мумкин: ушбу шаҳарлар қиёфаси бутунлай ўзгарди, ижтимоий инфратузилма ривожланди.
Маданият ва санъат саройлари, соғлиқни сақлаш, таълим, спорт муассасалари, хизмат кўрсатиш ва сервис шохобчалари, дам олиш масканлари ҳудудлар кўркига кўрк қўшди.
Қишлоқларда барпо этилаётган замонавий уйлар оилалар фаровонлигини юксалтирмоқда. Мустақиллик байрами арафасида минглаб ана шундай янги уй-жойлар ўз эгаларига топширилди.
Ўзбекистонда транспорт инфратузилмаси изчил ривожланмоқда. Янги йўллар, йўл ўтказгичлар бунёд этилмоқда. Ўзбекистон ҳудудлари ягона темир йўл тармоғига боғланмоқда. 2013 йилда улкан стратегик аҳамиятга эга яна бир янги йўл — Ангрен-Поп темир йўли қурилиши бошланди. 124 километрлик мазкур темир йўл, шу жумладан, 19 километрлик туннел Ўзбекистоннинг марказий қисмини Фарғона водийси билан боғлайди, Шарқий Осиё мамлакатларининг Ғарб давлатларига чиқишида муҳим бўғин бўлиб хизмат қилади.
Қишлоқ хўжалигида амалга оширилган туб ислоҳотлар, фермерлик ҳаракатининг самарадорлиги туфайли озиқ-овқат маҳсулотлари етиштириш йилдан йилга кўпайиб бормоқда. Сабзавот, картошка, полиз экинлари, мева, узум етиштириш, мева-сабзавот маҳсулотларини қайта ишлаш ҳажми ошиб боряпти.
Жорий йилнинг 6 июнида пойтахтда бўлиб ўтган «Ўзбекистонда озиқ-овқат дастурини амалга оширишнинг муҳим захиралари» мавзусидаги халқаро конференцияда қатнашган хорижлик мутахассислар ва ишбилармонлар буни яна бир бор эътироф этди, Ўзбекистон эришган ютуқларни тан олди.
Бу йил деҳқонлар саккиз миллион 50 минг тонналик юксак хирмон бунёд этди. Мустақилликкача дон ва ун таъминоти бўйича бошқаларга қарам бўлиб келган халқ айни пайтда ўз эҳтиёжини таъминлаш билан бирга, хорижий давлатларга дон экспорт қилмоқда. Ғаллачилик ривожи чорвачилик ва паррандачилик каби бошқа кўплаб тармоқларга ҳам ижобий таъсир этиб, гўшт, сут, тухум каби озиқ-овқат маҳсулотларининг мўл бўлишини таъминламоқда.
Изоҳ (0)