Janubiy Koreya poytaxti Seul shahri meri Pak Von Sun O‘zbekiston davlat mustaqilligining 23 yilligiga atab Toshkentda Seul bog‘i ochilishi munosabati bilan o‘zbek xalqiga tabrik yo‘lladi. Bu haqda “Jahon” AA xabar berdi.
“O‘zbekiston suverenitetga ega bo‘lganining 23 yilligi nishonlanadigan kunda Toshkentda Seul bog‘i ochilayotgani quvonarlidir, — dedi u. — Shu munosabat bilan Seul aholisi nomidan Respublika rahbariyatiga bog‘ni barpo etishda har tomonlama hamkorlik ko‘rsatgani uchun minnatdorlik bildiraman”.
Pak Von Sun O‘zbekiston poytaxtida yaratilgan bog‘ har ikkala davlatlar o‘rtasidagi do‘stlik va hamkorlik aloqalarini yanada mustahkamlashiga umid bildirdi.
“Shunga aminmanki, Seul bog‘i shaharning eng diqqatga sazovor joylaridan biriga aylanadi va O‘zbekistonga sayyohlar oqimi ko‘payishiga o‘z hissasini qo‘shadi”, — deya o‘z tabrigiga yakun yasadi mer.
Seul bog‘i poytaxtdagi Bobur istirohat bog‘i hududida joylashgan bo‘lib, uning umumiy maydoni 17,5 gektarni, ko‘kalamzorlashtirilgan hudud 7 gektarni tashkil etadi.
Koreya tomonidan moliyalashtirilgan Toshkentdagi “Seul bog‘i”ni qurishdan asosiy maqsad Janubiy Koreya madaniyati, an’analari, milliy xususiyatlarini targ‘ib etishga, shuningdek, mamlakatlar o‘rtasida ikki tomonlama hamkorlikni rivojlantirishga ko‘maklashishdan iborat bo‘ldi.
Ta’kidlash joiz, Islom Karimovning 2010-yil fevral oyida Janubiy Koreyaga qilgan tashrifi chog‘ida Toshkent va Seul shaharlari ma’muriyatlari vakillari o‘rtasida Toshkentdagi “Seul bog‘i”ni qurish bo‘yicha kelishuv imzolangan edi.
Izoh (0)