Toshkentdagi Megaplanet savdo markazi yaqinidagi chorrahada 51-raqamli Mercedes Benz avtobusi halokatga uchradi, deb xabar bermoqda Facebook’dagi “Voditeli Tashkenta” (“Toshkent haydovchilari”) guruhi a’zolari.
Voqea 29-avgust, juma kuni kechki payt sodir bo‘lgan. “Taxminlarga ko‘ra, haydovchi avtobus boshqarish chog‘ida uxlab qolgan”, — deb yozadi post muallifi. Shundan so‘ng avtobus simyog‘ochga urilgan. Natijada simyog‘och ham, uning yonidagi daraxt ham qulab tushgan.
Avtobus ichida yo‘lovchilar bo‘lmagan, biroq haydovchi va konduktorga ziyon yetgan, deyiladi Facebook'dagi postda. “Guvohlarning so‘zlariga ko‘ra, konduktor old oynadan otilib ketgan”, — deya aniqlik kiritdi foydalanuvchi.
Shuningdek Matiz avtomobili daraxt ostida qolib ketib, zarar ko‘rgan.
Postga fikr bildirganlar avtobus haydovchisiga tanqid toshlarini yog‘dirgan. Foydalanuvchilardan biri halokat aks etgan mana shu suratlarni boshqalarga ham dars bo‘lishi uchun avtobusning old oynasiga yopishtirib qo‘yish kerakligini ta’kidlagan.
Yo‘l-transport hodisasi yuzasidan rasmiy ma’lumot berilmagan.
Izoh (0)