Жанубий Корея ҳукумати Пхеньян ўзининг ядро билан боғлиқ режаларидан воз кечса, КХДРга халқаро инвестицияларни жалб этишда ёрдам бериши мумкин. Бу ҳақда Республика бош вазирининг иқтисодий масалалар бўйича биринчи ўринбосари Чой Гён Хванга асосланиб, Ренхап агентлиги хабар берди.
«Агар Шимолий Корея ўз ядро қуролини яратишдан воз кечишга қарор қилса, биз КХДРнинг халқаро молия ташкилотлари билан ҳамкорлик қилиб, халқаро инвестицияларга эга бўлишида ёрдам бериш учун Шимоли-Шарқий Осиё мамлакатлари билан ҳамкорлик қилишга тайёрмиз», — деди Чой Гён Хван.
Бундан ташқари, бош вазир ўринбосари минтақадаги бошқа қўшни мамлакатлар билан ҳамкорликда, КХДРга мамлакатнинг ночор фуқароларини қўллаб-қувватлаш учун зарур инфратузилмани шакллантиришга кўмаклашувчи Шимоли-Шарқий Осиё мамлакатлари тараққиёт банкини тузишга ҳам ваъда берди.
2005 йилнинг 10 февралида КХДР илк марта ўзининг ядро қуролига эга эканлигини тан олган. КХДР ўзининг дастлабки ерости ядро синовларини 2006 йилнинг 9 октябрь куни амалга оширган. Ўша вақтда КХДР қўллаган ядро қуролининг қуввати 5 дан 15 килотоннагача етган.
2005—2013 йилларда КХДР ҳукумати ўтказган ерости ядро синовлари дунё ҳамжамиятининг эътирозига сабаб бўлган. Бунга жавобан БМТ Хавфсизлик Кенгаши КХДРдан ядро соҳасидаги фаоллигини тўхтатишни талаб қилувчи бир қатор қарорларни қабул қилган эди. Бироқ шунга қарамасдан, 2013 йилдаги маълумотларга кўра, КХДРнинг ракета ва ядро дастурларига ажратган маблағи 3,24 миллиард доллардан ошган.
Изоҳ (0)