Yevropaning Rossiyaga qarshi kiritgan sanksiyalari va uning javob choralari Fransiya, Ispaniya, Italiya, Germaniya kabi davlatlardagi iqtisodiy vaziyatlarga ancha salbiy ta’sir ko‘rsatmoqda. Bunda Yevropaning 5 milliard yevro mablag‘i va 130 ming ish o‘rinlari xavf ostidadir, deb yozadi Euronews.
Rossiya Yevroittifoqning uchinchi eng muhim savdo sherigi bo‘lsa, Rossiya uchun YeI birinchi sherikdir. Biroq savdo balansi Yevropa foydasiga shakllanmayapti. Yevropa komissiyasi ma’lumotlariga ko‘ra, 2013-yilda YeIning 28 mamlakatiga Rossiyadan import hajmi eksport hajmidan 86,7 milliardga oshib ketgan.
Rossiyaning Yevropa mevalari, sabzavotlari, go‘shti, balig‘i va sutiga embargosi tufayli vaziyat yanada chigallashdi. YeI fermerlarga yordam tariqasida 125 million yevro ajratgan bo‘lsa-da, Yevropadagi barcha mintaqalar zarar ko‘rdi.
Bu Yevropa iqtisodiyotida jiddiy asorat qoldirishi mumkin. Birgina Polshada yalpi ichki mahsulot 0,6 foizga kamayishi kutilmoqda. Moskva hisob-kitoblariga ko‘ra, o‘zaro sanksiyalar Rossiyada inflyatsiyaning 1 foizga o‘sishiga olib keladi.
Biroq yevropaliklar asosan neft va gaz yetkazib berish embargoga uchrashidan xavfsiramoqda. Yevropa qishni Rossiya gazisiz o‘tkaza olmaydi, deyiladi xabarda.
Izoh (0)