Toshkentda Boeing kompaniyasining samolyotlarni ta’mirlash markazi 2014-yil oxirigacha ishga tushadi

Amerikaning Boeing Co kompaniyasi va O‘zbekistonning “O‘zbekiston havo yo‘llari” milliy aviakompaniyasi 2014-yil oxirigacha Toshkentda samolyotlarni ta’mirlash bo‘yicha markazni ishga tushiradi. Bu haqda aviakompaniyadagi manbasiga tayanib, “RIA Novosti” xabar berdi.

Sentabrda uskunalarni montaj qilish, noyabrda sozlash ishlari yakunlanadi va yil oxirigacha markaz ochiladi. Dastlabki bosqichda markaz Boeing-757 va Boeing-767 samolyotlarining yirik qismlarini ta’mirlashni o‘zlashtiradi, 2016-yilda esa Boeing-787’ga xizmat qilishni boshlaydi.

2007—2008-yillarda “O‘zbekiston havo yo‘llari” Boeing bilan jami 645 million dollarlik to‘rtta Boeing-767-300ER va ikkita Boeing 787-8 Dreamliner samolyotlarini sotib olish haqida shartnoma imzolagan. Shu yilning iyulida Boeing-767-300ER’ni yetkazib berish bo‘yicha shartnoma amalga oshirlgan. Ikkita 787-800 Dreamliner esa 2016-yilda yetkazib beriladi.

“O‘zbekiston havo yo‘llari” MAK O‘zbekistondagi monopol aviatashuvchi bo‘lib, to‘liq davlatga tegishlidir. Kompaniya aviaparki G‘arbda ishlab chiqarilgan 33 ta samolyotdan iborat bo‘lib, bular 15 ta Boeing (o‘nta 767-300 va beshta 757-200), uchta A-310 aerobusi, o‘nta A-320 aerobusi, uchta RJ o‘rta magistrali hamda ikkita A300-600F yuk tashuvchilaridir.

Aviakompaniya Yevropa, Amerika, Yaqin Sharq va Osiyodagi 21 shaharga, MDH davlatlaridagi 22 shaharga hamda mahalliy avialiniyalardagi 11 ta yo‘nalish bo‘yicha aviareyslarni amalga oshiradi.