O‘tgan 23 yil davomida onalar va go‘daklar o‘limi uch barobardan ko‘proq kamaydi, deb yozadi O‘zbekiston Respublikasi Sog‘liqni saqlash vazirligi matbuot xizmati.
Ma’lum bo‘lishicha, “Ona va bola skriningi” dasturi amalga oshirilishi natijasida tug‘ma nuqsonli bolalar tug‘ilishi 2000-yildan buyon 1,8 marta kamaygan. Bugungi kunda mamlakatimiz bolalarining 92 foizi rivojlanish ko‘rsatkichlari bo‘yicha Jahon sog‘liqni saqlash tashkiloti standartlariga to‘la mos keladi.
Bundan tashqari, so‘nggi 5 yil mobaynida nonormal rivojlangan bolalar tug‘ilishi 1,3 barobarga kamaydi. 6—15 yoshgacha bo‘lgan bolalar o‘rtasida o‘tkir respirator virus infeksiyalari bilan kasallanish – 9,7 foizga, pnevmoniya bilan – 49,1%, bronxit bilan – 32,8%, skolioz bilan kasallanish – 32,7 foizga pasaygan.
“Shuni ham aytish kerakki, soha rivoji uchun davlat byudjetidan ajratilayotgan mablag‘lar yildan-yilga ko‘payib bormoqda, — deyiladi vazirlik xabarida. — Agar 2012-yilda soha rivoji uchun davlat byudjetidan 2,8 trillion so‘m mablag‘ ajratilgan bo‘lsa, 2013-yilda ushbu ko‘rsatkich 3,4 trillion so‘mga yetdi. Joriy 2014-yilda esa sog‘liqni saqlash tizimini yanada yaxshilash maqsadida davlat byudjetidan 4,3 trillion so‘m ajratilishi rejalashtirilgan”.
2013-yilning o‘zida sog‘liqni saqlash sohasiga yo‘naltirilgan investitsiyalar hajmi 2010-yilga nisbatan 3,8 barobar oshdi. Buning natijasida 295 ta tibbiyot obyekti rekonstruksiya qilinib, foydalanishga topshirildi.
Izoh (0)