Американинг Boeing Cо компанияси ва Ўзбекистоннинг «Ўзбекистон ҳаво йўллари» миллий авиакомпанияси 2014 йил охиригача Тошкентда самолётларни таъмирлаш бўйича марказни ишга туширади. Бу ҳақда авиакомпаниядаги манбасига таяниб, «РИА Новости» хабар берди.
Сентябрда ускуналарни монтаж қилиш, ноябрда созлаш ишлари якунланади ва йил охиригача марказ очилади. Дастлабки босқичда марказ Boeing-757 ва Boeing-767 самолётларининг йирик қисмларини таъмирлашни ўзлаштиради, 2016 йилда эса Boeing-787’га хизмат қилишни бошлайди.
2007—2008 йилларда «Ўзбекистон ҳаво йўллари» Boeing билан жами 645 миллион долларлик тўртта Boeing-767-300ER ва иккита Boeing 787-8 Dreamliner самолётларини сотиб олиш ҳақида шартнома имзолаган. Шу йилнинг июлида Boeing-767-300ER’ни етказиб бериш бўйича шартнома амалга оширлган. Иккита 787-800 Dreamliner эса 2016 йилда етказиб берилади.
«Ўзбекистон ҳаво йўллари» МАК Ўзбекистондаги монопол авиаташувчи бўлиб, тўлиқ давлатга тегишлидир. Компания авиапарки Ғарбда ишлаб чиқарилган 33 та самолётдан иборат бўлиб, булар 15 та Boeing (ўнта 767-300 ва бешта 757-200), учта А-310 аэробуси, ўнта А-320 аэробуси, учта RJ ўрта магистрали ҳамда иккита А300-600F юк ташувчиларидир.
Авиакомпания Европа, Америка, Яқин Шарқ ва Осиёдаги 21 шаҳарга, МДҲ давлатларидаги 22 шаҳарга ҳамда маҳаллий авиалиниялардаги 11 та йўналиш бўйича авиарейсларни амалга оширади.
Изоҳ (0)