2014-yil 20-avgust kuni Toshkent aeroportidan 15 nafar bemor bolalar Germaniya klinikalarida bepul davolanish uchun “Sog‘lom avlod uchun” xalqaro xayriya fondi vakillari hamrohligida Germaniyaga jo‘nab ketishdi. Bu haqda jamg‘arma matbuot xizmati xabar berdi.
Ta’kidlash joiz, 2002-yilda “Sog‘lom avlod uchun” xalqaro xayriya fondi, O‘zbekiston Respublikasi Sog‘liqni saqlash vazirligi, Germaniyaning Friedensdorf International xalqaro tashkiloti birgalikda uch tomonlama hamkorlik bitimi imzolagan edi. Hamkorlik doirasida 12 yoshgacha bo‘lgan bemor va nogiron bolalarni davolash va reabilitatsiya qilish bilan shug‘ullaniladi. 2002—2014-yillar davomida 249 nafar O‘zbekistonlik bemor bolalar terining kuyish asoratlari, tug‘ma qo‘l-oyoq bo‘g‘imlari va boshqa tashxislar bilan Germaniyaning nufuzli klinikalarida davolanishdi.
Ushbu xalqaro tashkilotning grant mablag‘i hisobiga 2014-yil 8 oy davomida respublika bo‘yicha jami 172 nafar tug‘ma lab-tanglay nuqsoni bo‘lgan nogiron bolalarda jarrohlik operatsiyalari o‘tkazildi.
Shu bilan bir qatorda “Chiroyli oyoqchalar” loyihasi doirasida tug‘ma oyoq nuqsoni (maymoqlik) va “Qiyshiq bo‘yin” tashxisi bilan 15 yoshgacha bo‘lgan bolalarni operatsiya qilish maqsadida 2014-yil 8 oy davomida 204 nafar bemor bolalar operatsiya qilindi.
24-avgust kuni esa Germaniya Respublikasidan 6 nafar sog‘lomlashtirilgan bolalar yurtimizga qaytib kelishadi.
Izoh (0)