O‘zbekiston aholisining 92 foizi o‘z oilasini baxtli deb hisoblaydi

“Ijtimoiy fikr” jamoatchilik fikrini o‘rganish markazi “Oila va ma’naviyat” mavzusida ijtimoiy so‘rov o‘tkazdi, deya xabar berdi “Narodnoye slovo” gazetasi.

So‘rov natijalariga ko‘ra, ishtirokchilarning 92,3 foizi o‘z oilasini baxtli deb hisoblaydi. Bu ayniqsa qishloq aholisi tomonidan ko‘proq qayd etildi.

Shuningdek, so‘ralganlarning 52,2 foizi jamiyatda ma’naviy muhit shakllanishida oiladan keyingi o‘rinda mahalla eng katta ta’sir o‘tkazishini aytgan bo‘lsa, 47,6 foizi bu borada ta’lim muassasalari, 26,2 foizi ommaviy axborot vositalarining roli kattaligini ta’kidlagan.

Bundan tashqari, tadqiqotlar shuni ko‘rsatdiki, yosh avlod umumiy qadriyatlar borasida o‘z ota-onalari bilan bir xil fikrda.

So‘rov ishtirokchilari mustaqillik yillari davomida mamlakatda oliy ta’lim olishga talab kuchayganini ham aytib o‘tgan.

Tadqiqot natijalari, shuningdek mamlakatning mutlaq ko‘pchilik fuqarolari ajralishlar va fuqarolik nikohlariga salbiy munosabatda ekanligini ko‘rsatdi.