Xitoylik milliarder Chen Guanbyao minglab kambag‘al amerikaliklarni restoranga tushlik qilish uchun taklif qildi. Tushlikdan tashqari, tashrif buyurganlar 300 dollar pulga ham ega bo‘ladilar. Bu haqda “ITAR-TASS” xabar berdi.
Ushbu tushlikka taklifnomalar New York Times va Wall Street Journal gazetalarida reklama sifatida joylashtirildi. “Men bu ishim bilan Xitoyda ham insonparvar kishilar borligini isbotlamoqchiman”, — deydi milliarder South China Morning Post gazetasiga bergan intervyusida.
Milliarderning aytishicha, uning takliflariga 250 kishi javob yozgan. Lekin bo‘sh joy qolmasligiga hech qanday shubha bo‘lishi mumkin emas. Xayriya tushligi 25-iyun kuni “Boat haus” restoranida bo‘lib o‘tadi. Shuningdek, tadbir tashkilotchisi mehmonlarga Maykl Jeksonning mashhur “We Are the World” qo‘shig‘ini kuylab beradi.
Chen Guanbyao o‘z boyligiga qurilish chiqindilarini qayta ishlash orqali erishgan bo‘lib, u o‘zining g‘alati xatti-harakatlari bilan mashhurdir. 2008-yili u Sichuan ko‘chalarida zilziladan jabr ko‘rgan kishilarga pul ulashgan.
Bir necha yil avval biznesmen tortishuvlarga sabab bo‘lgan Dyaoyuydao orollarining Xitoyga tegishli ekanligini New York Times gazetasida “tantanali e’lon qilgan”. Shu bilan birga, biznesmen Amerikaning eng mashhur gazetalaridan biri bo‘lgan New York Times gazetasini sotib olishga ham qarshi emasligini aytib o‘tgan.
Izoh (0)