Shanxay hamkorlik tashkiloti rahbarligidagi terrorizmga qarshi “Tinchlik missiyasi” harbiy mashg‘ulotlari avgust oyi oxirida Xitoyning “Chjujixe” poligonida o‘tkaziladi. Bu haqda Rossiya Sharqiy harbiy okrugi polkovnigi Aleksandr Gordeyev so‘zlariga asoslanib, “RIA Novosti” xabar berdi.
Shanxay hamkorlik tashkilotini Rossiya, Qozog‘iston, Xitoy, Qirg‘iziston, Tojikiston va O‘zbekiston davlatlari tashkil qiladi. Belorussiya, Shri-Lanka va Turkiya ushbu davlatlar bilan sheriklik maqomiga egalar.
“Tinchlik missiyasi” mashg‘ulotlari 2014-yilning 24-avgustidan 29-avgustiga qadar olib boriladi. Rossiya tomonidan 800 dan ortiq harbiy xizmatchilar ishtirok etib, turli xildagi harbiy texnikadan foydalaniladi.
Bundan tashqari, o‘quv mashqlari davomida okrug aviatsiyasi, jumladan sakkizta Mi-8 vertolyotlari, to‘rtta Su-25 hujumchi samolyotlari va ikki dona Il-76 harbiy yuk tashuvchi samolyotlaridan keng ko‘lamda foydalaniladi.
Iyun oyining boshlarida Rossiya Federatsiyasi Xavfsizlik Kengashi kotibi Nikolay Patrushev Rossiya va Xitoy nafaqat ikki tomonlama, balki mintaqaviy hamkorlikni ham kuchaytirishi kerakligini aytgan edi.
Izoh (0)