2014-yilning 6-iyunidan 20-iyuniga qadar Toshkent shahridagi Inha universitetida o‘qish istagida bo‘lgan yoshlardan imtihon topshirish uchun zarur hujjatlarni qabul qilish jarayoni davom etadi. Ayni paytda Toshkent shahridagi Inha universiteti binosida kapital qurilish va ta’mirlash ishlari olib borilayotgani tufayli universitet qabul komissiyasi Turin politexnika universiteti qoshidagi akademik litseyda faoliyat ko‘rsatmoqda. Bu haqda O‘zbekiston Respublikasi Aloqa, axborotlashtirish va telekommunikatsiya texnologiyalari qo‘mitasi xabar berdi. Akademik litsey Olmazor tumani, Umid ko‘chasi, 1-“a” uyda joylashgan.
Universitetga kirish istagida bo‘lgan yoshlar joriy yilning 7-mayidan 20-iyuniga qadar avval Toshkent shahridagi Inha universitetining www.inha.uz veb-saytida onlayn ro‘yxatdan o‘tishlari kerak.
“Toshkent shahridagi Inha universitetiga imtihon topshirish uchun hujjatlar qabul qilish to‘xtatilishiga 2 kun qolganini inobatga olib, universitetda o‘qish istagida bo‘lgan abituriyentlardan zarur hujjatlarni zudlik bilan topshirishlarini so‘raymiz”, — deyiladi xabarda.
Abituriyentlarga qulay shart-sharoit yaratib berish maqsadida, Qabul komissiyasi har kuni 9:00 dan 18:00 ga qadar, shuningdek shanba hamda yakshanba kunlari ham faoliyat ko‘rsatmoqda.
Matematika va fizika fanlaridan yozma imtihonlar joriy yilning 6-iyul kuni, ingliz tilida suhbat 27-iyul kuni bo‘lib o‘tadi. Imtihon javoblari 8-avgust kuni e’lon qilinadi.
Qo‘shimcha ma’lumotlar yuzasidan qo‘ng‘iroq qilish uchun telefon raqami: +998 71 246-05-73.
Izoh (0)