O‘zbekiston hukumati “O‘zbekiston havo yo‘llari” Milliy aviakompaniyasining zarariga ishlayotgan ikkita xalqaro aeroporti — “Buxoro” va “Navoiy”ni moliyaviy-iqtisodiy jihatdan sog‘lomlashtirish bo‘yicha dastur — “yo‘l xaritalari”ni tasdiqladi. Bu haqda UzDaily xabar berdi.
“Yo‘l xaritalari”ga muvofiq, ushbu aeroportlar moliyaviy-iqtisodiy ahvoli aviatashuvlarni ko‘paytirish, moddiy-texnik bazani modernizatsiya qilish va mustahkamlash, debitor va kreditor qarzdorlikni kamaytirish hisobiga yaxshilanadi.
Kutilishicha, Janubiy Koreyaning Korean Air kompaniyasi “Navoiy” aeroporti orqali olib o‘tiladigan yuk reyslarini 103 taga, tashuv hajmini esa 4,2 tonnaga oshiradi.
“O‘zbekiston havo yo‘llari” MAK Lufthansa va Turkish Airlines aviakompaniyalari bilan muzokaralar olib borib, ularni yuk reyslari parvozi va texnik qo‘nishlar uchun “Navoiy” aeroportiga jalb qilmoqchi.
Shu kabi chora-tadbirlar natijasida “Navoiy” aeroportining 2014-yilda 54,74 milliard so‘mlik (2013-yilda 42,916 milliard so‘m) xizmat ko‘rsatib, 2,5 milliard so‘mlik foyda (2013-yilda 6,55 milliard so‘mlik zarar) ko‘rishi kutilmoqda.
“Buxoro” aeroportida ko‘rsatilgan xizmatlar qiymati esa 2013-yildagi 18,726 milliard so‘mdan 2014-yilda 22,92 milliard so‘mga oshishi nazarda tutilgan. O‘tgan yildagi 4,73 milliard so‘mlik ziyon o‘rniga esa 342 million foyda ko‘rishi rejalashtirilgan.
Izoh (0)