Mashhur aviatsiya blogeri va inflyuyenser Sem Chui (Sam Chui) ijaraga olingan Boeing 747-400 samolyotida to‘y marosimini o‘tkazdi. Tantana Ummon ko‘rfazi osmonida bo‘lib o‘tdi va zamonaviy aviatsiya tarixidagi eng g‘ayrioddiy nikohlardan biriga aylandi.
Ilgari Singapore Airlines aviakompaniyasi tomonidan foydalanilgan samolyot marosimni o‘tkazish uchun maxsus tayyorlangan. U Fujayra xalqaro aeroportidan (FJR) havoga ko‘tarilgan va 95 daqiqa davomida amirlik qirg‘oqlari va ko‘rfaz suvlari ustida aylanma parvoz qilgan. Soat 20:00 da layner yerga qaytgan.
Marosim barcha an’anaviy to‘y marosimlariga rioya qilingan holda o‘tkazilgan: kelin, styuardessa Fiona oq ko’ylakda, kuyov Sem esa klassik oq libosda edi, mehmonlarni qizil gilamli yo‘lakcha kutib oldi, musiqa yangradi va to‘y tortini kesish bilan yakunlandi. Yo‘lak, raqs maydoni va tantanalar uchun joy yaratish maqsadida samolyotdan 100 ga yaqin o‘rindiqlar olib tashlandi. Bu samolyotni kelin-kuyovning birinchi raqsi va to‘y nutqlari uchun noyob uchish maydoniga aylantirdi.
Bortda er-xotinning qarindoshlari, do‘stlari, shuningdek, taklif etilgan jurnalistlar va aviatsiya hamjamiyati vakillari bor edi.
Sem Chui marosimdan olingan videoni o‘z platformalariga joyladi. Video tezda yuz minglab ko‘rishlar to‘pladi va ijtimoiy tarmoqlarda shov-shuvli reaksiyaga sabab bo‘ldi.
Sem Chui YouTube va boshqa ijtimoiy tarmoqlarda millionlab obunachilarga ega bo‘lgan dunyodagi eng nufuzli aviatsiya sharhlovchilaridan biri sifatida tanilgan. U bir necha bor noyob reyslar, kam uchraydigan samolyot turlari va VIP kayutalar haqida sharhlar yozgan. Biroq blogerning o‘zi tan olishicha, 747 bortidagi to‘y “hayotidagi eng shaxsiy va muhim parvoz” bo‘lgan.
Izoh (0)