2014 йилнинг 6 июнидан 20 июнига қадар Тошкент шаҳридаги Инҳа университетида ўқиш истагида бўлган ёшлардан имтиҳон топшириш учун зарур ҳужжатларни қабул қилиш жараёни давом этади. Айни пайтда Тошкент шаҳридаги Инҳа университети биносида капитал қурилиш ва таъмирлаш ишлари олиб борилаётгани туфайли университет қабул комиссияси Турин политехника университети қошидаги академик лицейда фаолият кўрсатмоқда. Бу ҳақда Ўзбекистон Республикаси Алоқа, ахборотлаштириш ва телекоммуникация технологиялари қўмитаси хабар берди. Академик лицей Олмазор тумани, Умид кўчаси, 1-«а» уйда жойлашган.
Университетга кириш истагида бўлган ёшлар жорий йилнинг 7 майидан 20 июнига қадар аввал Тошкент шаҳридаги Инҳа университетининг www.inha.uz веб-сайтида онлайн рўйхатдан ўтишлари керак.
«Тошкент шаҳридаги Инҳа университетига имтиҳон топшириш учун ҳужжатлар қабул қилиш тўхтатилишига 2 кун қолганини инобатга олиб, университетда ўқиш истагида бўлган абитуриентлардан зарур ҳужжатларни зудлик билан топширишларини сўраймиз», — дейилади хабарда.
Абитуриентларга қулай шарт-шароит яратиб бериш мақсадида, Қабул комиссияси ҳар куни 9:00 дан 18:00 га қадар, шунингдек шанба ҳамда якшанба кунлари ҳам фаолият кўрсатмоқда.
Математика ва физика фанларидан ёзма имтиҳонлар жорий йилнинг 6 июль куни, инглиз тилида суҳбат 27 июль куни бўлиб ўтади. Имтиҳон жавоблари 8 август куни эълон қилинади.
Қўшимча маълумотлар юзасидан қўнғироқ қилиш учун телефон рақами: +998 71 246-05-73.
Изоҳ (0)