Toshkent shahar Chilonzor tumanida uchta avtomobil ishtirokida yo‘l-transport hodisasi sodir bo‘ldi. Bu haqda Facebook’dagi “Voditeli Tashkenta” (“Toshkent haydovchilari”) guruhi a’zolari xabar berdi.
Foydalanuvchilardan biri guruhda yo‘l-transport hodisasiga guvoh bo‘lgani haqida xabar qoldirib, rasmlarni ilova qilgan. Unda ikkita Lacetti va bitta “Jiguli” avtomobilining tamoman pachoqlanib, xarob ahvolga kelganini ko‘rish mumkin. “‘Ho‘l asfalt’ rangidagi Lacetti yap-yangi holatda bo‘lgan ekan”, — deb yozadi guruh a’zosi.
Postga qoldirilgan izohlardan ma’lum bo‘lishicha, halokat Chilonzor tumanida ro‘y bergan. “Farhod bozoridan ‘Vatan’ kinoteatri tomonga qarab ketgan yo‘l yaqinda ta’mirlanib, tep-tekis qilindi. Mana endi u yerda kimo‘zarga bahslashishmoqda”, — deya qayd etgan foydalanuvchilardan biri.
O‘sha foydalanuvchining aniqlik kiritishicha, “Jiguli” yo‘l chetida to‘xtab turgan, ichida hech kim bo‘lmagan. “Halokatni Lacetti’dagi yosh yigit boshladi”, — deb yozadi u. Har ikkala Lacetti ham yuqori tezlikda yurib kelgan. Jiguli va to‘q kulrang rangdagi Lacetti “qayta ta’mirlab bo‘lmaydigan” ahvolda bo‘lsa, oq Lacetti ularga nisbatan kamroq ziyon ko‘rgan. Haydovchilarning qanchalik darajada jarohat olgani noma’lum.
Postga qoldirilgan fikrlarning ko‘pchiligida YTH sababchilari bo‘lgan Lacetti'larga achinish yo‘qligi, xayot ularga saboq bergani ta‘kidlangan.
Izohlarga ko‘ra, halokatda qurbonlar bo‘lmagan. YTH, uning sababi va jabrlanuvchilar haqida rasmiy ma’lumot berilmagan.
Izoh (0)