O‘zbekiston terma jamoasi va Moskvaning “SSKA” klubi futbolchisi Abbosbek Fayzullayevning “Bashakshehir” klubiga transferi amalga oshmasligi mumkinligi haqida xabarlar tarqaldi. Unga ko‘ra, futbolchi tibbiy ko‘rikdan muvaffaqiyatli o‘ta olmagan.
Biroq “SSKA” matbuot kotibi Kirill Breydo bu ma’lumotlarni rad etdi. Uning ta’kidlashicha, Fayzullayev 22-iyul kuni Turkiyaga yetib borgan va tibbiy ko‘rik 23-iyul kuni, ya’ni ertaga o‘tkazilishi rejalashtirilgan.
Abbos transfer bo‘yicha tibbiy ko‘rikdan o‘tish uchun jo‘nab ketdi. Tekshiruv ertaga boshlanadi. Hozircha klublar transfer bitimini rasmiylashtirish ustida ish olib bormoqda, — dedi Breydo Match TV nashriga bergan izohida.
Eslatib o‘tamiz, avvalroq ayrim OAVda Fayzullayev “Bashakshehir” uchun o‘tkazilgan tibbiy ko‘rikdan o‘ta olmagani haqida xabarlar tarqalgan edi.
Ma’lumot uchun, Fayzullayev “SSKA” tarkibida hozirgacha jami 72 uchrashuvda maydonga tushib, 8 ta gol va 22 ta golli uzatmaga mualliflik qilgan. Transfermarkt portali unga 8 million yevro qiymat belgilagan.
O‘zbekiston terma jamoasi a’zosi 7,5 million yevro evaziga “Bashakshehir” klubiga o‘tishi kutilmoqda. Manbalarga ko‘ra, u Istanbul klubi bilan 2 yoki 3 yillik shartnoma imzolaydi.
Izoh (0)