Strategik sheriklik haqidagi bitimga o‘n yil to‘lgani munosabati bilan Rossiya va O‘zbekiston prezidentlari bir-biriga tabrik xati yuborishdi

Kecha, 16-iyun kuni Rossiya Federatsiyasi va O‘zbekiston Respublikasi o‘rtasida Strategik sheriklik to‘g‘risidagi shartnoma imzolanganiga o‘n yil to‘ldi. Shu munosabat bilan O‘zbekiston va Rossiya prezidentlari bir-birlarini tabriklashdi. Bu haqda Rossiya Federatsiyasining O‘zbekiston Respublikasidagi elchixonasi matbuot xizmati xabar berdi.

Vladimir Vladimirovich Putin o‘z tabrigida O‘zbekiston Respublikasi fuqarolariga tinchlik-xotirjamlik tilab, ushbu muhim hujjat Rossiya-O‘zbekiston munosabatlarining sifatli yangi darajaga chiqishiga imkon yaratganini, turli sohalarda o‘zaro manfaatli ikki tomonlama hamkorlikning kengayishini ta’minlaganini ta’kidladi.

Islom Abdug‘aniyevich Karimov esa o‘z murojaatida ushbu hujjat asosida yaratilgan birgalikdagi harakat va siyosiy dialog mexanizmlari mintaqa xavfsizligi va barqarorligi masalalari bo‘yicha ochiq fikr almashinishning amaliy vositasiga aylanganini qayd etdi.