O‘zbekiston bank tizimi rivojlanishi prognozi “barqaror” bo‘lib qolmoqda. Moody’s Investors Service xalqaro agentligining 15-aprel kuni e’lon qilingan hisobotida aytilishicha, “barqarorlik” prognozi O‘zbekiston iqtisodiyotining yuqori o‘sish sur’atlari bilan bog‘liq bo‘lib, hukumat yirik banklar orqali mamlakat iqtisodiyotiga sezilarli darajada katta miqdorda investitsiya yo‘naltirmoqda, deb yozadi “Kun” nashri.
Agentlik xabarida keltirilishicha, O‘zbekiston banklarining yuqori daromadi prognozga ijobiy ta’sir ko‘rsatgan omillardan biridir.
Moody’s qayd etishicha, O‘zbekiston xom ashyo resurslari (paxta, tabiiy gaz va g‘alla) narxlarining barqaror saqlanib turgani ham yaxshi ko‘rsatkich bo‘lib, mamlakat banklari aktivlari sifatining barqaror sur’atlariga olib kelgan.
Reyting agentligining prognoz qilishicha, so‘nggi 12—18 oy davomida muammoli kreditlarning soha bo‘yicha ajratilgan kreditlar hajmidagi ulushi 6—7% atrofida bo‘lib turadi. Ammo bu qarzlar bo‘yicha banklar tomonidan shakllantirilgan zaxira miqdori muammoli kreditlarning taxminan 50 foizini qoplaydi va Moody’s fikricha, bu “yetarli emas”.
Kelgusi 12—18 oy davomida O‘zbekiston banklari kreditlashning tez o‘sishi bilan bog‘liq bo‘lgan risklarga duch keladi. Bu o‘z navbatida, bank tizimidagi kapital darajasining kamayishiga olib keladi. Qolaversa, O‘zbekiston bank tizimi tuzilmaviy kamchiliklarga ega bo‘lib, korporativ boshqaruvning past darajada rivojlangani va davlatning banklar faoliyati hamda narx siyosatiga aralashuvining yuqori darajada bo‘lib turgani agentlik tomonidan alohida qayd etib o‘tilgan.
O‘zbekiston banklarining amaliyot daromadlari MDH mamlakatlaridagi banklar orasida eng yuqorilardan biri bo‘lib, bunga komissiya daromadlarining yuqori darajasi turtki bo‘lgan. Agentlikka ko‘ra, bu jami amaliyot daromadlari orasida 40 foizni tashkil qiladi.
Moody’s qayd etishicha, O‘zbekiston banklari to‘lov qobiliyati hisobot davri uchun barqaror bo‘lib qoladi.
Izoh (0)