Ichki ishlar vazirligi Kirish-chiqish va fuqarolikni rasmiylashtirish boshqarmasi vakillari biometrik pasportlar almashtirilishi haqidagi mishmishlarni rad etdi. Bu haqda Gazeta.uz xabar berdi.
Kirish-chiqish va fuqarolikni rasmiylashtirish boshqarmasi vakillari bilan to‘g‘ridan-to‘g‘ri muloqot chog‘ida berilgan savolga javoban, hozirgi biometrik pasportlarni almashtirish haqidagi ma’lumot asossiz ekani aytildi. Muloqotda bo‘lgan savol-javoblar “Postda” gazetasida chop etilgan.
Boshqarma vakilining ta’kidlashicha, o‘z egasining fuqaroligi va shaxsini tasdiqlovchi, shu bilan birga, elektron yo‘l hujjati bo‘lgan ushbu biometrik pasportlar barcha xalqaro standartlarga to‘liq javob beradi.
O‘zbekiston 2011-yil noyabrida biometrik pasport ishlab chiqarishni boshladi. O‘zbekiston Davlat personallashtirish markazi direktori Najmiddin To‘raxo‘jayevning ma’lum qilishicha, kuniga 16 mingta pasport ishlab chiqariladi. Ayni paytgacha 5 millionta pasport chiqarildi. “O‘zbekistonda jami 20 million kishi pasport bilan ta’minlanishi kerak”, — dedi u.
Vazirlar Mahkamasining 6-fevraldagi qaroriga ko‘ra, joriy yilning 1-iyulidan boshlab xorijga chiqmoqchi bo‘lgan O‘zbekiston Respublikalari fuqarolari biometrik pasportga ega bo‘lishi kerak.
Izoh (0)