“O‘zbekenergo” 2014-yilda 750 mln dollarlik investitsiyalarni o‘zlashtiradi

Toshkentda bo‘lib o‘tgan matbuot anjumanida “O‘zbekenergo” DAK vakillari ma’lum qilishicha, kompaniya 2014-yilda 750 million dollar miqdoridagi kapital mablag‘larni o‘zlashtirish va oltita loyiha bo‘yicha ishlarni tugatishni rejalashtirmoqda. Bu haqda “Jahon” AA xabar berdi.

Investitsion faoliyati chog‘ida “O‘zbekenergo” DAK elektr stansiyalari va elektr tarmoqlarini modernizatsiyalash va rekonstruksiya qilish bilan shug‘ullanadi. Bundan maqsad energiya tizimi ishini barqarorlashtirish va mamlakat elektr energiyasining eksport salohiyatini oshirishdan iborat.

Ayni paytda kompaniya Talimarjon IES, Navoiy IESni kengaytirish, Namangan viloyati To‘raqo‘rg‘on tumanida issiqlik elektr stansiyasi va Samarqand viloyatida quyosh fotoelektr stansiyasi qurish bo‘yicha loyihalarni amalga oshirish ustida ishlamoqda.