Shimoliy Koreya yangi parlamentining 9-aprel kuni ochiladigan sessiyasidan keyin hukumatning 1,2 mingga yaqin amaldorlari hamda ularning oila a’zolari qatl etiladi va konslagerlarga jo‘natiladi. Bu to‘g‘rida Yaponiyaning “Sankey” gazetasi KXDR hukumat doiralariga yaqin bo‘lgan o‘z manbalariga tayangan holda xabar bergan, deb yozadi “RIA Novosti”.
Nashr bergan ma’lumotlarga ko‘ra, o‘tgan yilning dekabrida Kim Chen Inning pochchasi Chan Son Txek qatl etilganidan buyon hukumatdagi 200 ga yaqin amaldor va ularning ming nafarga yaqin qarindoshlari suiqasdga aloqadorlikda gumonlanib hibsga olingan. Parlament sessiyasi ochilishidan keyin ularning yarmi qatl etiladi, qolganlari esa konslagerlarga jo‘natiladi, deyiladi xabarda.Mamlakat rahbariyati konslagerlarning hududlarini kengaytirib, ulardagi binolar sonini ko‘paytira boshlagan. Xususan, Xamgyon-Pukto provinsiyasidagi Xvasong-16 va Chxonjin-25 lagerlari hamda Pxyonan-Namdo provinsiyasidagi Pukchang-18 lagerlari kengaytiriladi. Xabarda ta’kidlanishicha, bular “hech kim tirik qaytmaydigan” qattiq rejimli lagerlardir.
KXDR yangi parlamenti sessiyasida mamlakat yetakchisi tomonidan pochchasining qatlidan keyin amalga oshirilgan kadrlar almashinuvi tasdiqlanishi kutilmoqda. “Sankey” gazetasining yozishicha, “yog‘li” lavozimlarni muayyan miqdordagi valyuta evaziga sotib olish mumkin. Masalan, Xalq armiyasidagi yuqori lavozimlar 5 mingdan 20 ming dollargacha “narxlangan”, provinsiya ma’muriyatidagi amaldor o‘rni esa 800 dollarga yaqin turadi.