Шимолий Кореяда мингдан ошиқ мансабдорлар ҳамда уларнинг қариндошлари қатл этилади ва лагерларга жўнатилади

Шимолий Корея янги парламентининг 9 апрель куни очиладиган сессиясидан кейин ҳукуматнинг 1,2 мингга яқин амалдорлари ҳамда уларнинг оила аъзолари қатл этилади ва концлагерларга жўнатилади. Бу тўғрида Япониянинг «Санкей» газетаси КХДР ҳукумат доираларига яқин бўлган ўз манбаларига таянган ҳолда хабар берган, деб ёзади «РИА Новости».

Нашр берган маълумотларга кўра, ўтган йилнинг декабрида Ким Чен Иннинг поччаси Чан Сон Тхек қатл этилганидан буён ҳукуматдаги 200 га яқин амалдор ва уларнинг минг нафарга яқин қариндошлари суиқасдга алоқадорликда гумонланиб ҳибсга олинган. Парламент сессияси очилишидан кейин уларнинг ярми қатл этилади, қолганлари эса концлагерларга жўнатилади, дейилади хабарда.

Мамлакат раҳбарияти концлагерларнинг ҳудудларини кенгайтириб, улардаги бинолар сонини кўпайтира бошлаган. Хусусан, Хамгён-Пукто провинциясидаги Хвасонг-16 ва Чхонжин-25 лагерлари ҳамда Пхёнан-Намдо провинциясидаги Пукчанг-18 лагерлари кенгайтирилади. Хабарда таъкидланишича, булар «ҳеч ким тирик қайтмайдиган» қаттиқ режимли лагерлардир.

КХДР янги парламенти сессиясида мамлакат етакчиси томонидан поччасининг қатлидан кейин амалга оширилган кадрлар алмашинуви тасдиқланиши кутилмоқда. «Санкей» газетасининг ёзишича, «ёғли» лавозимларни муайян миқдордаги валюта эвазига сотиб олиш мумкин. Масалан, Халқ армиясидаги юқори лавозимлар 5 мингдан 20 минг долларгача «нархланган», провинция маъмуриятидаги амалдор ўрни эса 800 долларга яқин туради.