O‘zbekistonda 2024-yilda yalpi qishloq xo‘jaligi mahsuloti hajmi 444,6 trillion so‘mga yetdi va 5 yil ichida 18,5 foizga o‘sdi, deb xabar bermoqda Makroiqtisodiy va hududiy tadqiqotlar instituti.
Vazirlar Mahkamasi huzuridagi ushbu institut mutaxassislari qishloq xo‘jaligining so‘nggi 5 yildagi rivojlanishini tahlil qildi. Unga ko‘ra, so‘nggi 5 yilda yalpi mahsulotning o‘rtacha yillik o‘sish sur’ati 103,5 foizni tashkil etdi.
O‘zbekistonning qishloq xo‘jaligi sohasi mintaqada yetakchi o‘rinni egallab kelmoqda: yalpi mahsulot hajmi Qozog‘iston, Tojikiston va Qirg‘izistonning ko‘rsatkichlaridan yuqori bo‘lib, bu uning ko‘lami va strategik ahamiyatini aks ettiradi.
Jahon banki ma’lumotlariga ko‘ra, O‘zbekistonda qishloq xo‘jaligida band bo‘lgan bir kishiga to‘g‘ri keladigan qo‘shilgan qiymat dunyodagi o‘rtacha darajadan 4,4 baravar yuqori bo‘lib, bu agrar sektorning samaradorligi va uning unumdorligi ortib borayotganini ko‘rsatadi.
Mamlakat aholisining faol o‘sishiga qaramay, aholi jon boshiga nisbatan qishloq xo‘jaligining asosiy turdagi oziq-ovqat mahsulotlarini ishlab chiqarish barqaror oshib bormoqda:
- don ekinlari — 238,2 kilogramm (5 yil ichida +7,6 foiz)
- kartoshka — 100,0 kilogramm (+8,7 foiz)
- sabzavotlar — 322,7 kilogramm (+6,1 foiz)
- meva va rezavorlar — 88,0 kilogramm (+7,4 foiz)
- uzum — 49,1 kilogramm (+2,9 foiz)
- poliz ekinlari — 72,2 kilogramm (+17,2 foiz)
- go‘sht — 79,2 kilogramm (+7,5 foiz)
- sut — 334,8 kilogramm (+4,9 foiz)
- tuxum — 236,9 dona (+2,4 foiz).
Mutaxassislarning qayd etishicha, bu ko‘rsatkichlarning o‘sishi soha jadal rivojlanayotgani va oziq-ovqat xavfsizligini ta’minlash bo'yicha erishilayotgan muvaffaqiyatdan dalolat beradi.
O‘zbekistonda 2025-yilda 4 million 800 ming gektarda ekinlar yetishtirish mo‘ljallangan. Shundan 2 million gektardan ziyod yerda meva-sabzavot, kartoshka, dukkakli va poliz mahsulotlari ekiladi. Ularning dalalarda joylashtirilishi va hosilning zaxiraga jamlanishi monitoring qilib boriladi. Xususan, aholiga birlamchi zarur bo‘lgan 10 turdagi asosiy oziq-ovqat mahsulotlarining tizimli hisob-kitobi yuritiladi.
Izoh (0)