O‘zbekistonning Jahon savdo tashkilotiga a’zo bo‘lishi doirasida O‘zbekiston va Rossiya muzokaralar olib bordi. Bu haqda prezidentning JST bo‘yicha maxsus vakili Aziz Urunov LinkedIn’da ma’lum qildi.
Uning bildirishicha, 11-mart kuni bosh vazir o‘rinbosari Jamshid Xo‘jayev boshchiligidagi delegatsiya Moskvada Rossiya iqtisodiy rivojlanish vaziri Maksim Reshetnikov va uning o‘rinbosari Vladimir Ilichyev bilan o‘tkazgan muzokaralarda JSTga a’zolik doirasida bozorga chiqish bo‘yicha “hal etilmagan masalalar” ko‘rib chiqilgan.
“Muzokaralar foydali, mazmunli va konstruktiv o‘tdi. Ayni paytda ikkala tomon ham oldinga siljishga intilmoqda. Qisqa vaqt ichida taqdim etgan fayllarimizga tezkor reaksiya qilganliklari uchun rossiyalik hamkasblarga minnatdorchilik bildirmoqchiman”, deb yozdi Urunov 14-mart kuni LinkedIn’dagi sahifasida.
Rossiya Iqtisodiy taraqqiyot vazirligi matbuot xizmatining ma’lum qilishicha, Maksim Reshetnikov bu uchrashuvda Rossiya va O‘zbekiston prezidentlari o‘rtasidagi kelishuvlar asosida “Rossiya gazi, nefti va neft mahsulotlarini yetkazib berish oshib borayotgani”ni qayd etgan.
“Shu nuqtayi nazardan, O‘zbekiston energetika infratuzilmasini modernizatsiya qilish bo‘yicha rejalashtirilgan loyihalarni amalga oshirish muhimligi qayd etildi. O‘zaro oziq-ovqat yetkazib berish hajmi oshdi, bunda Rossiya hajm bo‘yicha deyarli paritetga ega: Rossiyadan O‘zbekistonga 1 milliard dollarga va O‘zbekistondan qariyb 1 milliard dollarga”, deyiladi vazirlik xabarida.
Tashrif davomida bosh vazir o‘rinbosari Jamshid Xo‘jayev Rossiya bosh vazirining birinchi o‘rinbosari Denis Manturov va bosh vaziri o‘rinbosari Denis Patrushev bilan ham uchrashuvlar o‘tkazgan. O‘zbekiston delegatsiyasi tarkibida Markaziy bank raisi Timur Ishmetov va transport vaziri birinchi o‘rinbosari Mamanbiy Omarov ham bo‘lgan.
“Biz O‘zbekiston bozorini bizning eksportchilarimiz uchun juda istiqbolli deb bilamiz. Kungaboqar yog‘i, qandolatchilik, don va chorvachilik mahsulotlarini yetkazib berishni ko‘paytirishga tayyormiz”, degan Patrushyev uchrashuvda.
Uning qayd etishicha, 2024-yilda Rossiya va O‘zbekiston o‘rtasida qishloq xo‘jaligi mahsulotlari va oziq-ovqat mahsulotlarining tovar aylanmasi 20 foizga oshdi. 2025-yilda ham ijobiy dinamika saqlanib qoladi.
O‘zbekiston nima uchun JSTga aʼzo bo‘lishi kerak?
Aziz Urunov tashkilotga a’zolik haqida “Daryo”ga bergan intervyusida “Jahon savdo tashkilotiga aʼzo bo‘lishdan oladigan eng birinchi manfaatimiz — iqtisodiyotda korxonalar uchun teng sharoit yaratilishidir. Bu o‘z navbatida raqobat muhiti yaxshilanishiga olib keladi va bu ikkinchi muhim jihat — raqobat muhiti yaratilishiga olib keladi. Raqobatsiz rivojlanish qiyin. Tez rivojlangan davlatlar tajribasiga qaralsa, ularda iqtisodiy o‘sishning asosiy manbalaridan biri raqobat muhiti bo‘lgan. Uchinchidan, sifatli investitsiyalar keladi. Bu iqtisodiyotning barqaror o‘sishi uchun muhim omil”, deb aytgandi.
O‘zbekiston 2026-yilgacha Jahon savdo tashkilotiga aʼzo bo‘lmoqchi. Shavkat Mirziyoyev O‘zbekistonning ushbu tashkilotga a’zo bo‘lishi chuqur o‘ylangan va uzoqni ko‘zlagan tanlov ekanligini ta’kidlagandi.
Izoh (0)