Prezident Shavkat Mirziyoyevning Malayziyaga rasmiy tashrifi sharafiga Petronas egizak minoralari O‘zbekiston bayrog‘i ranglariga burkandi. Bu haqda “Daryo” muxbiri xabar berdi.
Eslatib o‘tamiz, O‘zbekiston yetakchisi Malayziya bosh vaziri Anvar Ibrohimning taklifiga binoan 4—5-fevral kunlari rasmiy tashrif bilan Malayziyada bo‘ladi.
Tashrif dasturiga muvofiq, Kuala Lumpur shahrida oliy darajadagi muzokaralar, qator ishbilarmonlik va madaniy tadbirlar bo‘lib o‘tadi. Bosh vazir Anvar Ibrohim bilan ikki tomonlama muzokaralar, Malayziyaning yetakchi kompaniyalari rahbarlari bilan uchrashuvlar, qo‘shma biznes forumi va boshqa tadbirlarda ko‘zda tutilgan.
Bo‘lajak oliy darajadagi muzokaralar kun tartibidan O‘zbekiston—Malayziya do‘stlik munosabatlarini yanada rivojlantirish hamda amaliy hamkorlikni, shu jumladan, savdo, investitsiyalar, innovatsiyalar, texnologik kooperatsiya, neft-kimyo, elektronika, “yashil” energetika, “aqlli” qishloq xo‘jaligi, turizm va boshqa ko‘plab ustuvor yo‘nalishlarda kengaytirish masalalari o‘rin olgan. Madaniy-gumanitar almashinuvni faollashtirishga alohida e’tibor qaratiladi.
Yetakchilar xalqaro siyosat va mintaqaviy hamkorlikning dolzarb jihatlarini ham ko‘rib chiqadi.
Sammit yakunida ikki davlat o‘rtasidagi keng ko‘lamli sheriklikni yanada rivojlantirishga qaratilgan qo‘shma bayonot va salmoqli bitimlar to‘plami qabul qilinishi rejalashtirilgan.
Malayziya bosh vaziri 2024-yil 17—19-may kunlari rasmiy tashrif bilan O‘zbekistonda bo‘lgandi. O‘zbekiston prezidenti oliy darajadagi ushbu tashrif so‘nggi 16 yilda ilk bor o‘tkazilayotganini, ikki tomonlama munosabatlar tarixida yangi davr ochayotganini taʼkidlagandi. Muzokaralarda O‘zbekiston bilan Malayziya o‘rtasidagi do‘stlik va ko‘p qirrali sheriklik munosabatlarini yanada kengaytirish masalalari ko‘rib chiqilib, unda savdo-iqtisodiy va investitsiya sohalarida amaliy hamkorlik masalalariga alohida eʼtibor qaratilgandi.
29-may kuni Putrajaya shahrida Savdo-iqtisodiy hamkorlik bo‘yicha hukumatlararo komissiyaning birinchi yig‘ilishi samarali o‘tkazildi. O‘zbekiston—Malayziya ishbilarmonlar kengashi tuzildi.
Yanvar oyida Shavkat Mirziyoyevning Birlashgan Arab Amirliklariga rasmiy tashrifi sharafiga Dubaydagi dunyoning eng baland binosi — “Burj Xalifa” O‘zbekiston bayrog‘i ranglariga burkangan edi.
Izoh (0)