AOKAda o‘tkazilgan matbuot anjumanida “Olmaliq kon-metallurgiya kombinati” AJ mas’ullari tomonidan transformatsiya jarayonlari yuzasidan ma’lumot berildi.
Hozirgi kunda OKMKda transformatsiya yo‘nalishida bir qator samarali ishlar amalga oshirilmoqda. Dastur doirasida Moliyaviy hisobotning xalqaro standartlariga o‘tish, Strategiya va operatsion samaradorlik, Korporativ boshqaruv tizimini takomillashtirish, Barqaror rivojlanish (ESG), Raqamlashtirish kabi yo‘nalishlarda keng ko‘lamli ishlar amalga oshirilmoqda.
OKMK nafaqat samarali, balki uzoq muddatli istiqbolda barqaror va raqobatbardosh bo‘lishi uchun korxonada Transformatsiya, ESG tartibi va xalqaro reytinglar loyiha ofisi tashkil etildi. Ushbu jamoa shaffof hisobotdan tortib strategik rejalashtirishgacha bo‘lgan eng yaxshi jahon amaliyotlarini joriy etish uchun masʼuldir.
OKMK 2019-yildan boshlab moliyaviy hisobotning xalqaro standartlari — biznes uchun butun dunyoda tan olingan qoidalar bo‘yicha hisobot yuritadi. Ushbu standartlarni joriy etishga Ernst & Young, Deloitte kabi auditorlik kompaniyalari ko‘maklashdi. Bu OKMKga S&P (“B+”) va Fitch (“BB-” barqaror prognoz) xalqaro kredit reytinglarini olish, shuningdek, vositachilarsiz to‘g‘ridan-to‘g‘ri xalqaro banklardan moliyalashtirishni jalb qilish imkonini berdi. Natijada OKMK 2,3 milliard dollar kredit mablag‘larini jalb qildi va 125 million dollar moliyaviy xarajatlarni iqtisod qildi.
Shuningdek, kombinat 56 ball bilan Sustainable Fitch tomonidan uchinchi darajali ESG reytingiga ega bo‘ldi. Bu O‘zbekistondagi tarmoq korxonalari orasida eng yuqori ko‘rsatkich hisoblanadi.
Kombinatda korrupsiyaga qarshi kurashish va xaridlar shaffofligiga ham alohida eʼtibor qaratilib, KPMG tomonidan audit o‘tkazildi. Bu o‘z navbatida samaradorlikni oshirish yo‘llarini aniqlab berdi. PwC Central Asia and Caucasus kompaniyasi kondan metallurgiya zavodigacha bo‘lgan butun “mis zanjiri”ni baholadi va ishlab chiqarishni optimallashtirish bo‘yicha “yo‘l xaritasi”ni yaratishga ko‘maklashdi. Ernst&Young kompaniyasi komplayens va moliyaviy barqarorlik bo‘yicha maslahatlar berdi.
Hozirda OKMK “masʼuliyatli mis ishlab chiqaruvchi” sifatida The Copper Mark xalqaro sertifikatlashdan o‘tmoqda. Bu mahsulotlarning Yevropa bozorida raqobatbardoshligini taʼminlaydi va ekologik yo‘naltirilgan investitsiyalarni ko‘proq jalb qilish imkonini beradi.
Reklama huquqi asosida.
Izoh (0)