O‘zbekistonda 2024-yilda 100 264 ta xonadon aholiga topshirilgani ma’lum qilindi. 

Xabarga ko‘ra, 2024-yilda 2 044 ta ko‘p kvartirali uy foydalanishga topshirilib, jami 100 264 ta xonadon aholiga topshirildi. 2022–2024-yillar davomida jami 4 920 ta ko‘p kvartirali uy qurilib, ularda 221 mingdan ortiq xonadon aholiga topshirilgan.

Yillik ko‘rsatkichlar quyidagicha:

• 2022-yilda 1 433 ta uy (56 115 ta xonadon),
• 2023-yilda 1 443 ta uy (65 528 ta xonadon),
• 2024-yilda 2 044 ta uy (100 264 ta xonadon).

Ta’kidlanishicha, nogironligi bo‘lgan shaxslar, yetim bolalar va kam ta’minlangan oilalar uchun mo‘ljallangan ijtimoiy ahamiyatga ega uy-joylar soni ham ortib bormoqda.

Shuningdek, “Yangi O‘zbekiston” massivlarida olib borilayotgan qurilish ishlari ham izchil davom ettirilmoqda. 2025-yilga kelib bunday massivlar soni 29 tadan 56 taga yetkazilgan. Ayni paytda ushbu massivlarda 890 ta uy qurilib, 31 692 ta xonadon foydalanishga topshirilgan.

Ikkilamchi bozordagi uy-joy narxlari

Mart oyida mamlakatda ikkilamchi bozorda uy-joylarning o‘rtacha narxi fevral oyi darajasida qoldi. Yillik hisobda respublikada bir kvadrat metr uy-joy narxi 0,9 foizga oshdi. Hududlar kesimida eng sezilarli o‘sish Jizzax (12,3 foiz), Surxondaryo (10,7 foiz) va Qashqadaryo (8,5 foiz) viloyatlarida kuzatildi.

Toshkent shahrida ko‘chmas mulk bozoridagi vaziyat

Mart oyida Toshkent shahri ko‘chmas mulk bozorida ikkilamchi uy-joylarning o‘rtacha narxi 0,6 foizga, birlamchi bozor narxlari esa 0,4 foizga kamaygan.

O‘tgan yilning mart oyiga nisbatan ikkilamchi uy-joylarning o‘rtacha narxi 5,7 foizga kamaygan bo‘lsa, birlamchi uy-joy segmentida pasayish 3,7 foizni tashkil etdi.

Yillik hisobda Toshkent shahri bo‘yicha ikkilamchi uy-joy narxida eng katta pasayish Mirobod (8 foiz), Chilonzor (8,7 foiz) va Yashnobod (7,5 foiz) tumanlarida kuzatildi.

Yangi uylar narxlarida ham pasayish kuzatildi. Yil davomida bir kvadrat metr uchun o‘rtacha narxlarda eng sezilarli pasayish Shayxontohur (14,7 foiz), Uchtepa (11 foiz) va Yunusobod (6,7 foiz) tumanlarida qayd etildi.

Uy-joy ijara bozori

Mart oyida Toshkent shahrida ijara narxlarida o‘zgarish kuzatilmadi va o‘rtacha ijara narxi 8 dollarni (bir kvadrat metr uchun) tashkil etdi.

Poytaxtning Mirobod, Shayxontohur va Yakkasaroy tumanlarida ijara narxi nisbatan yuqoriligicha qolmoqda. Ushbu tumanlarda ijara narxi bir kvadrat metr uchun o‘rtacha 10 dollarni tashkil etadi.

Shu bilan birga, Toshkent shahrida ijara narxi yillik hisobda 7,4 foizga pasaygan. Narxlarning eng katta pasayishi Mirzo-Ulug‘bek, Yashnobod va Chilonzor tumanlarida qayd etilib, pasayish surʼati o‘rtacha 10 foizga yetadi.

O‘zbekistonda uy-joy bozori

Avvalroq Makroiqtisodiy va hududiy tadqiqotlar instituti mutaxassislari respublikada uy-joy va ipoteka bozoridagi faollik darajasini tahlil qilgandi. Unga ko‘ra, 2024-yilning III choragida O‘zbekiston uy-joy bozorida faollik darajasi pasaydi. Xususan, iyul-sentyabr oylarida ko‘p qavatli uylardagi kvartiralar oldi-sotdisi uchun 41 861 ta shartnoma rasmiylashtirilgan. Ushbu ko‘rsatkich 2023-yilning mos davridagiga nisbatan 3362 taga (7,4 foizga) kam.

Iqtisodiy tadqiqotlar va islohotlar markazi tahliliga ko‘ra, oktyabr oyida ko‘chmas mulk bozorining hududlar kesimidagi dinamikasi Toshkent viloyatida (+10 foiz) sezilarli o‘sdi, shuningdek, Qoraqalpog‘iston Respublikasi (+8,1 foiz) va Jizzax viloyatida (+7,5 foiz) ijobiy o‘zgarishlarni ko‘rsatdi.

Tahlillar tijorat banklari tomonidan ajratilgan ipoteka kreditlari va aholi tasarrufidagi daromadlar uy-joy bozoriga taʼsir etuvchi muhim omillar ekanligini ko‘rsatdi.

Vazirlar Mahkamasining 2024-yil 11-noyabrdagi qarori bilan uy-joy sotib olish uchun subsidiyalar ajratish tartibiga o‘zgartirish va qo‘shimchalar kiritildi. Qaror bilan subsidiyalar bilan qoplanadigan foiz to‘lovlari miqdoriga ham o‘zgartirish kiritildi. Endilikda yangi kreditlar uchun yillik 12 foizdan yuqori qismi, 2025-yildan boshlab esa Markaziy bankning asosiy stavkasidan ortiq qismi qoplanadi.

Boshlang‘ich to‘lov va foizlarning bir qismini qoplash uchun subsidiyalar Iqtisodiyot va moliya vazirligi tomonidan besh ish kuni ichida to‘lanadi.