“Klon” 25 yoshda: serialdagi sevishganlar Lukas va Jadi nega hayotda til topisha olmagan?

Braziliya kinoijodkorlari tomonidan suratga olingan “Klon” seriali efirga uzatila boshlaganiga 25 yil to‘ldi. Butun dunyoda bir necha tillarga tarjima qilingan mashhur loyiha bosh qahramonlaridan biri Jadi obrazini Jovanna Antonelli ijro etgan. Quyida aktrisaning hayot va ijod yo‘li haqida ko‘pchilik bilmaydigan ma’lumotlar keltiriladi.
 

Braziliyalik aktrisa Jovanna Antonelli serialda oilaviy urf-odatlarga qarshi turishga harakat qilgan Jadi ismli marokashlik qiz rolini o‘ynab, millionlab odamlarning qalbini zabt etdi.

Biografiya

Jovanna Antonelli — braziliyalik teatr va kino aktrisasi, fotomodel, teleboshlovchi hamda prodyuser. Bugungi kunda aktrisa dunyoning turli mamlakatlarida namoyish etilgan teleseriallar tufayli tanilgan. Muxlislar aktrisada ayollik va go‘zallikning kuchli, irodali xarakter bilan uyg‘unlashishini qadrlashadi. Jurnalistlar taniqli sanʼatkorning intervyu berishni istamasligini, shaxsiy hayotini ommaning haddan tashqari eʼtiboridan himoya qilishga harakat qilishini taʼkidlaydi.

Bolalik va yoshlik yillari

Antonelli 1976-yil bahorida Rio de Janeyroda tug‘ilgan. Teleyulduz opera xonandasi Gilton Prado va balerina Sueli Antonellining qizi. Oilada Jovannadan tashqari yana bir farzand, uning akasi Leonard ham bor edi.

Musiqa va ijod atmosferasi Antonelli oilasi a’zolariga begona emasdi. Shuning uchun Jovannaning ijodi 11 yoshida boshlangani ajablanarli emas. Shu yoshda bo‘lajak yulduz havaskor teatr sahnasiga chiqdi va o‘shandan beri uni tark etmadi. Aktrisa isteʼdodining ko‘p qirrali ekanini taʼkidlash kerak: u nafaqat rol o‘ynaydi, balki yaxshi qo‘shiq kuylaydi va raqsga tushadi. Shuning uchun ham vaqti-vaqti bilan ushbu havaskor teatrga tashrif buyuradigan prodyuserlar ko‘plab yosh aktyorlar orasidan darhol Jovannani tanlardilar.

Kinodagi karyerasining boshlanishi

16 yoshga to‘lganda, Antonelli ko‘pchilik singari kichik rollar bilan kinoga kirib kela boshladi. Yosh braziliyalik aktrisa suratga tushgan birinchi film mashhur “O‘zingizga havola” melodramasi bo‘ldi. Filmning namoyishi Lotin Amerikasi mamlakatlarida muvaffaqiyatli o‘tdi. Jovanna birinchi sezilarli muvaffaqiyatini “Tropikanka” seriali chiqqandan keyin qo‘lga kiritdi.

Aktrisaning karyerasida 2000-yil burilish nuqtasi bo‘ldi — o‘shanda u “Oilaviy rishtalar” mashhur melodramasida nopok yo‘llar bilan pul ishlashga majbur bo‘lgan yolg‘iz ona Kapitu rolini ijro etdi. Antonellining oldida murakkab vazifa turardi — hayot tarzi jamiyat tomonidan qoralangan qahramon obrazini ekranda shunday aks ettirish kerakki, tomoshabinlarda qahramonga nisbatan hamdardlik va mehr uyg‘onsin.

Obrazga chuqurroq kirib borish uchun Jovanna ushbu kasb vakillari bilan muloqot qila boshladi, ulardan biri hatto aktrisaning do‘stiga aylandi. Intervyuda Antonelli bunday ayollarga nisbatan nafrat his qilmasligini tan oldi — Braziliyada oddiy xalqning hayoti og‘ir, uy-joy ijarasini to‘lash uchun mahalliy ayollar shunday qurbonliklar qilishga majbur bo‘lishardi.

“Klon”

Aktrisaning yulduzlik cho‘qqisi deb 2001-yilni aytish mumkin, o‘sha yili u “Klon” melodramasida Jadi rolini o‘ynadi. Antonelli bilan birga loyihada uning bir necha yillik hamkasb do‘stlari — Daniela Eskobar (Jovanna qahramonining singlisini “Tropikanka”da o‘ynagan) hamda Vera Fisher (“Oilaviy rishtalar”da rol o‘ynagan) ham ishtirok etdi.
Jovannaning serialdagi partnyorlari Dalton Vig va Murilo Benisio bo‘lishdi.

Dastlab Antonelli sahnaga chiqqach, bir qator qiyinchiliklarga duch keldi. Baʼzi sahnalar uchun 168 sm bo‘yli aktrisa sharqona raqslarni, shu jumladan qilich va ilon bilan raqslarni o‘rganishi, arab tilida bir nechta iboralarni o‘zlashtirishi kerak edi. Jovanna uchun eng katta sinovlardan biri tuya ustida o‘tirgan sahnalar bo‘ldi — jonivordan qo‘rqib, aktrisa imkon qadar uni dublyor bilan almashtirishni so‘rardi.

Serialning suratga olish ishlari shu jumladan Marokashda o‘tkazildi — bu mamlakat Antonelliga unutilmas taassurotlarni qoldirdi. Ishdan bo‘sh vaqtlarida Jovanna mahalliy madaniyat bilan tanishdi, mahalliy ayollarning xulq-atvorini kuzatdi. Issiqda aktrisa murakkab grimda yurishi kerak edi — keyinchalik aktrisa bu uning terisining holatiga salbiy taʼsir qilganini tan oldi.

Tez orada sarflangan kuchlar o‘z samarasini berdi: serial chiqqandan so‘ng darhol Braziliya, Amerika va Yevropaning yana 30 mamlakatida juda mashhur bo‘ldi. Loyihaning muvaffaqiyati uning ko‘p qirrali ekani bilan bog‘liq edi. Serialda murakkab va dolzarb muammolar, musulmon mamlakatida ayolga munosabat, klonlash, xiyonat, giyohvandlikka qaramlik kabi mavzular ko‘tarildi. 25 yoshli Jovanna bunday shuhratni umuman kutmagandi. Aktrisa Murilo Benisio bilan birga filmni taqdim etish uchun dunyoning yarmini aylanib chiqdi.

Kelgusi faoliyati

“Klon” muvaffaqiyatidan so‘ng, aktrisa dastlabki yillarda rejissyorlardan ko‘plab takliflarni qabul qila boshladi. Har yili Antonelli 2-3 ta yangi filmda rol o‘ynadi — ular orasida serial va to‘liq metrajli filmlar ham bor edi. 2012-yilda Braziliya ekranlarida “Meni qutqar, muqaddas Jorj” melodramasi chiqdi, uning rejissyori “Klon”ning yaratuvchisi Gloria Peres edi. Anʼanaga ko‘ra, Peres dolzarb ijtimoiy muammolarni dramatik syujetga uyg‘un ravishda joylashtirdi — bu safar hikoya markazida odam savdosi mavzusi edi. Filmda Jovanna bosh rolni o‘ynadi.

Keyingi yillarda aktrisa ekranlardan tushmadi, bundan tashqari u mashhur “Kichkina xo‘jayin” multfilmining Braziliya versiyasi uchun ovoz berishda ishtirok etdi. Biroq Antonellining ish loyihalari orasida “Klon” kabi yorqin serial boshqa kuzatilmadi. 2018-yilda Jovanna “Ikkinchi quyosh” filmida bosh rolni o‘ynadi, keyin uning ijodida tanaffus bo‘ldi, shundan so‘ng braziliyalik ayol 2021-yilda ekranlarga qaytdi.

Shaxsiy hayot

Jovanna Antonellining shaxsiy hayoti qiziq voqealarga boy. Aktrisa 4 marta turmushga chiqqan, lekin bu nikohning faqat ikkitasi rasmiylashtirilgan. Jovanna birinchi turmush o‘rtog‘i tadbirkor Rikardo Medin bilan 4 yildan ko‘proq vaqt birga yashagan so‘ng 2001-yil oxirida ajrashishdi. Ajralishning sababi Antonellining Murilo Benisio bilan romantik munosabatlariga bog‘liq edi, ammo aktyorlarning o‘zlari munosabatlar serialdan keyin boshlanganini taʼkidlashgan.

Murilo Benisio bilan ishqiy munosabatlar

Shunga qaramay mish-mishlar oxirida tasdiqlandi. Jovanna va Murilo o‘z munosabatlarini mashhur teleko‘rsatuvda eʼlon qilishdi, bu esa “Klon” seriali muxlislarini juda xursand qildi. 2005-yilda mashhur yulduzlarning birinchi farzandi Petro dunyoga keldi. Ammo bola tug‘ilgandan so‘ng, deyarli darhol juftlik shon-shuhrat sinoviga dosh berolmay ajrashdi. Gap shundaki, ajralishning sababi Benisioning og‘ir tabiatiga bog‘liq edi. Aktyorlar ko‘p janjallashib qolishardi va oxiri aloqalarni uzishga qaror qilishdi.

2007-yilda Jovanna Antonelli yana turmushga chiqdi. Mashhur ayolning eri amerikalik tadbirkor Roberto Lokasio edi. Ularning to‘yi Toskana shahridagi qadimiy villalardan birida bo‘lib o‘tdi. Ammo to‘rt oy o‘tgach, Jovanna va Roberto ajrashishdi. Ajrimning sababi kinoaktrisaning sobiq eri Murilo Benisio edi. Erkak Jovannaga o‘g‘lini mamlakatdan olib chiqishni taqiqlab, Robertoning rejalariga putur yetkazgan. Roberto Jovanna bilan AQSHga ko‘chib ketmoqchi edi. 
 

Keyinchalik Antonelli rejissyor Leonardo Nogeyra bilan yashay boshladi. Ular 2009-yilda suratga olish maydonchasida uchrashishdi va 2010-yil noyabr oyida Antoniya va Sofiya ismli egizak qizlarning ota-onasi bo‘lishdi. Qizlar tug‘ilganiga qaramay, er-xotin hali ham rasmiy nikohni ro‘yxatdan o‘tkazmagan. Hozirda ijtimoiy tarmoqlarda baʼzida yulduzning eri va bolalari bilan suratlari paydo bo‘ladi.

Aktrisa shaxsiy hayotini syomka jarayonlari va biznes bilan muvaffaqiyatli birlashtirgan. Kino yulduzining o‘zi qaror qabul qilishda muvozanatni saqlab, sodir bo‘layotgan voqealarga ortiqcha ishtiyoqsiz munosabatda bo‘lishga imkon beradigan hayotiy qoidalari borligini taʼkidlaydi. “Munosabatlar — bu chinakam do‘stlik kabi. Ular hasad, o‘zaro talablar va ayblovlar, raqobatdan xoli”, deydi Jovanna.

Hozirgi Jovanna Antonelli

2022-yilda muxlislar Jovannani Eloiza Sampayo rolini o‘ynagan “Kesishish” serialida ko‘rishdi. Serial tomoshabinlar orasida mashhurlikka erishdi, ammo 2023-yilda yangi mavsum chiqmadi. Kino sohasida ishlashdan ortgan bo‘sh vaqtini Antonelli oilasi bilan o‘tkazadi, shuningdek biznes bilan shug‘ullanadi. Jovanna Gio brendi ostida atir va sumkalar chiqaradi. Intervyularda aktrisa o‘z mahsulotlarining targ‘iboti haqida gapiradi va o‘zi ham reklama roliklarida suratga tushadi.