Hukumatning “Harbiy xizmatchilarni ijtimoiy himoya qilish kuchaytirilishi munosabati bilan O‘zbekiston Respublikasi hukumatining ayrim qarorlariga o‘zgartirish va qo‘shimchalar kiritish to‘g‘risida”gi qarori qabul qilindi. Bu haqda Adliya vazirligi xabar berdi.
Qarorga ko‘ra, harbiy xizmatchilarga turar joyni ijaraga olganlik (ijarada turganlik) uchun to‘lab beriladigan oylik pul kompensatsiyasi miqdori 20 foizga oshirildi. Bunda pul kompensatsiyasi miqdorlariga quyidagicha o‘zgartirish kiritildi:
- Toshkent shahrida — BHMning 4,8 baravarigacha (1,8 mln so‘mgacha);
- Nukus shahrida va viloyatlar markazlarida — BHMning 3,6 baravarigacha (1 mln 350 ming so‘mgacha);
- respublikaning boshqa shaharlari, tumanlar markazlari va aholi punktlarida — BHMning 2 baravarigacha (750 ming so‘mgacha).
Shuningdek, 2025-yil 1-iyundan qonunchilik hujjatlariga muvofiq tasdiqlanadigan ipoteka kreditlarini ajratish ko‘rsatkichlari asosida uy-joy bilan taʼminlanadigan, kalendar hisobida 10 yildan ortiq harbiy xizmatni o‘tagan harbiy xizmatchilarga turar joy sotib olish (qurish) uchun ipoteka krediti olinishida ajratiladigan dastlabki badal miqdori uy-joyning hisoblangan qiymati 35 foizi miqdorida belgilandi. Oldin mazkur miqdor barcha uchun 25 foizni tashkil etgan.
Halok bo‘lgan harbiy xizmatchilarning oila aʼzolari va nogironligi bo‘lgan harbiy xizmatchilarni birinchi navbatda turar joy bilan taʼminlash, agar ular uzoq muddatli imtiyozli ipoteka krediti asosida turar joy bilan taʼminlangan bo‘lsa, qaytarilmagan kredit miqdori va kredit bo‘yicha hisoblangan foizlar Davlat byudjeti hisobidan to‘liq qoplab beriladi.
O‘zbekistonda harbiy xizmatchilarga “ijara puli” ipoteka uylari topshirilgunga qadar beriladi. Umumiy harbiy xizmat muddati 20 yil bo‘lgan harbiy xizmatni o‘tab rezervga bo‘shatilgan fuqarolar davlat hisobidan turar joy bilan ta’minlanadi.
Izoh (0)