Fransiya taraqqiyot agentligi (AFD) O‘zbekiston ipotekani qayta moliyalashtirish kompaniyasiga 30 million yevro moliyaviy mablag‘ ajratishi kutilmoqda. Bu haqda Energetika vazirligi matbuot xizmati xabar berdi.
Mazkur loyiha O‘zbekistonda turar joy binolarining energiya samaradorligini oshirish maqsadida ishlab chiqilayotgan bo‘lib, ayni paytda baholash va tayyorgarlik ishlari olib borilmoqda. Tomonlar mart oyida Shavkat Mirziyoyevning Fransiyaga tashrifi doirasida hamkorlik shartnomasini imzolagan.
Loyihaga ko‘ra, Fransiya taraqqiyot agentligi tomonidan kredit liniyasi va texnik yordam ajratilib, O‘zbekiston ipotekani qayta moliyalashtirish kompaniyasi orqali tijorat banklari ishtirokida yakuniy iste’molchilarga kreditlar taqdim etilishi ko‘zda tutilgan.
Ushbu loyiha doirasida aholining energiya samaradorligi bo‘yicha xabardorlik darajasini aniqlash uchun maxsus onlayn savolnoma o‘tkazilmoqda. Savolnoma loyihaning texnik konsultantlari, Juru va AETS (Fransiya) mutaxassislari tomonidan ishlab chiqilgan bo‘lib, yig‘ilgan ma’lumotlar loyihaning iqtisodiy va texnik asoslarini shakllantirishda foydalaniladi.
Energiya samaradorligi nima?
Energiya samaradorligi bir xil natijaga erishish uchun kamroq energiya sarflashni anglatadi. Misol uchun, agar uy yaxshi izolyatsiya qilingan bo'lsa, u qishda issiq, yozda esa kamroq isitish yoki sovutish bilan salqin bo‘lib qoladi. Bu nafaqat energiya to‘lovlari uchun pulni tejash, balki energiya tizimlarining kuchlanishini kamaytiradi va atrof-muhitga yordam beradi.
O‘zbekiston sharoitida qish mavsumi juda sovuq bo‘lib, ko‘plab binolar eski bo‘lgani uchun energiya samaradorligini oshirish uylarni yanada qulayroq qilish, shu bilan birga isitish va elektr energiyasiga sarflanadigan xarajatlarni kamaytirish demakdir.
Energiya samaradorligini oshirish, energiya sarfini kamaytirish va uy qulayligini yaxshilashni ta’mirlash orqali amalga oshiriladi. Bunga quyidagilar kiradi:
- devorlarga yoki tomlarga izolyatsiyani qo‘shish;
- eski oynalarni energiya tejaydiganlarga almashtirish;
- zamonaviy qozon yoki isitish tizimini yangilash;
- quyosh panellari yoki samarali konditsionerlarni o‘rnatish.
Bunday ta’mirlash oylik energiya to‘lovlarini kamaytirishi, ekstremal haroratlarda uyni yanada qulay qilish va mulkning qiymati va sifatini oshirishi mumkin.
Prezidentning 2025-yil 23-martdagi farmoni bilan Vazirlar Mahkamasi huzuridagi Energiya samaradorligi milliy agentligi tashkil etilgandi. Energiya samaradorligini oshirish sohasida yagona davlat siyosatini yuritish, sohada rag‘batlantiruvchi va ta’sir etuvchi choralar ishlab chiqish va tartibga solish agentlikning asosiy vazifalaridan biri etib belgilandi. Agentlikka rahbar etib Badriddinov Ziyoviddin tayinlangan.
Izoh (0)