Qatar Trampga hashamatli samolyot sovg‘a qildi (foto)

Qatar 400 milliard dollarlik hashamatli Boeing 747-8 samolyotini AQSH prezidenti Donald Trampga sovg‘a qildi. Bu haqda Associated Press xabar berdi.

Ushbu samolyot 90 nafar mehmon va 14 nafar ekipaj a’zosini sig‘dira oladi. Yo‘lovchilar ikki qavatda joylashgan beshta mehmonxona va shaxsiy vannaga ega yotoqxonadan foydalanishi mumkin. AQSH mudofaa vaziri Pit Xegsetning so‘zlariga ko‘ra, Qatar qirollik oilasi ushbu laynerni Tramp uchun sovg‘a qilgan va u Air Force One — “Birinchi bort” sifatida qabul qilingan. 

AQSH Mudofaa vazirligi samolyotdan prezident foydalanishi uchun tegishli xavfsizlik choralarini ko‘radi, dedi Pentagon vakili Shon Parnell.

U uchoq “barcha federal qoidalar va nizomlarga muvofiq” qabul qilinganini aytgan. AQSH prezidenti qimmatbaho sovg‘ani qabul qilgani uchun tanqidga uchragach, samolyot soliq mablag‘larini tejash usuli ekanini bildirgan.

Agar bizning harbiylarimiz, ya’ni soliq to‘lovchilarimiz bularning barchasini bepul olishi mumkin bo‘lsa, nega yuzlab million dollar sarflashlari kerak? degan Tramp.

AQSHdagi ayrim siyosatchilar bu konstitutsiyadagi chet el sovg‘alariga qo‘yilgan taqiqni buzish ekanini ta’kidlamoqda. Ular samolyotni xavfsizlik talablariga moslashtirish uchun modernizatsiya qilish zarurligi, bu esa ko‘p mablag‘ va vaqt talab qilishini bildirgan.

Konstitutsiyaga zid mazkur harakat nafaqat pulni tejaydi, balki mamlakatimiz qadr-qimmatini yo‘qotadi, balki soliq to‘lovchilarni ushbu samolyotni kapital ta’mirlash uchun 1 milliard dollardan ortiq mablag‘ sarflashga majbur qiladi, hozirda bizda bitta emas, ikkita to‘liq soz va to‘liq jangovar Air Force One samolyoti mavjud, dedi Illinoys shtatidan senator-demokrat Tammi Dakvort.

Tramp Qatardan kelgan samolyot shaxsan unga emas, balki AQSH harbiy-havo kuchlariga topshirilganini aytgan. U prezidentlik muddati tugagach, Qatar sovg‘asidan foydalanmasligini ma’lum qilgan. 

“Uchar saroy” haqida nimalar ma’lum

Ekspertlarning hisob-kitoblariga ko‘ra, samolyotning narxi aloqani himoya qilish uchun qo‘shimcha uskunalarni hisobga olmaganda, taxminan, 400 million dollarni tashkil etadi.

U dastlab AQSH harbiy-havo kuchlariga topshiriladi, ular 13 yillik aviatexnikani prezident uchun xavfsizlik talablariga muvofiq qayta jihozlaydi. Samolyot dizayni bilan Fransiyaning Cabinet Alberto Pinto agentligi shug‘ullangan. Natijada yo‘lovchi layneri ikki qavatli “uchar saroy”ga aylantirilgan. Uning ichki qismi hashamatli lyukslar, mehmonxonalar, oshxonalar, yo‘lovchilar uchun dam olish xonalari va yuvinish xonalariga bo‘lingan.

Asosiy yotoqxona samolyotning burun qismida, to‘g‘ridan to‘g‘ri kabina ostida joylashgan. Hozirgi birinchi raqamli bortlar 1990-yildan beri ishlatilgan eski Boeing 747-200 samolyotlaridir. 2018-yilda buyurtma qilingan yangi samolyotlarni yetkazib berish kechikmoqda. Ular faqat 2029-yilda, Tramp prezident bo‘lmaganida tayyor bo‘lishi kutilmoqda.