Misr, Qatar va Birlashgan Arab Amirliklari 18-may kuni Somali poytaxti Mogadishodagi harbiy baza yaqinida sodir etilgan xudkushlik hujumini keskin qoraladi. Bu haqda Anadolu xabar berdi.
Misr Tashqi ishlar vazirligi o‘z bayonotida Damaanyo harbiy bazasi yaqinidagi hujumni qoralagan. Halok bo‘lganlarning oila a’zolari va Somali xalqiga hamdardlik bildirilib, jarohatlanganlarning tezroq sog‘ayib ketishi tilangan.
Qatar Tashqi ishlar vazirligi ham portlashni qoralab, Doha zo‘ravonlik va terrorizmning har qanday ko‘rinishiga qarshi turishini ta’kidlagan.
Birlashgan Arab Amirliklari Tashqi ishlar vazirligi xuddi shunday bayonot bilan chiqib, Somali hukumati, xalqi va halok bo‘lganlarning oilalariga hamdardlik bildirgan.
Mahalliy manbalarga ko‘ra, hujumchi Somali milliy armiyasiga ro‘yxatdan o‘tish uchun navbatda turgan harbiylar orasida portlovchi moddalarni ishga tushirgan. Qurbonlar borligi aytildi, ammo hech bir guruh javobgarlikni o‘z zimmasiga olmagan. Xavfsizlik choralari kuchaytirilgan, tergov harakatlari olib borilmoqda.
Izoh (0)