Rossiya prezidenti Vladimir Putin va Ukraina rahbari Vladimir Zelenskiy urushni tugatishni muhokama qilish uchun uchrashishi mumkin. Kreml matbuot kotibi Dmitriy Peskov bu qanday holatda amalga oshishini ma’lum qildi.
Peskovga ko‘ra, prezidentlarning shaxsan uchrashuvi faqat ikki davlat delegatsiyalari o‘rtasida “muayyan kelishuvlarga erishilgan” taqdirdagina amalga oshadi.
Biz bunday uchrashuvni ikki tomon delegatsiyalarining muayyan kelishuvlarga erishishdagi faoliyati natijasi sifatida o‘tkazish mumkin deb hisoblaymiz. Ammo aynan ish natijasi va ikki tomonning kelishuvlari ko‘rinishidagi ma’lum natijalarga erishilganidan so‘nggina, dedi Peskov.
U Moskva uchun Ukraina tomonidan aynan kim bunday kelishuvlarni tasdiqlashi muhim ekanini aytdi.
Delegatsiyalar kelishib olishi kerak bo‘lgan hujjatlarni imzolashda Ukraina tomonidan ularni kim imzolashi biz uchun asosiy va prinsipial bo‘lib qolmoqda, dedi u.
Rossiya o‘t ochishni to‘xtatishni muhokama qilish doirasida Kiyev uchun shartlar to‘plamini tayyorlamoqda. Peskov bu takliflarning tafsilotlarini oshkor qilishdan bosh tortdi va muzokaralar yopiq tarzda o‘tayotganini aytdi.
Putin Ukraina va Yevropa Ittifoqining bir qator davlatlari tomonidan ilgari surilgan 30 kunlik sulh tashabbusini rad etgan edi. Buning o‘rniga u Istanbuldagi muzokaralar formatiga qaytishni taklif qilgan. Bunga javoban Zelenskiy Putin bilan shaxsan uchrashishga tayyorligini aytgan. Biroq Rossiya prezidenti bunga rozi bo‘lmagan va muzokaralar uchun yordamchisi Vladimir Medinskiy boshchiligidagi delegatsiyani Istanbulga yuborgan.
Zelenskiy bunday qadamni “Moskvaning muzokaralarga jiddiy munosabatda emasligini namoyish etish” deb atagan. Biroq Ukraina tomoni baribir muzokaralarda ishtirok etishga qaror qildi.
Uch yil ichida birinchi marta Rossiya va Ukraina delegatsiyalarining ikki tomonlama uchrashuvi 16-may kuni Istanbulda bo‘lib o‘tdi. The Economist nashri yozishicha, Rossiya tomoni muzokaralar maydonchasidan nafaqat o‘z pozitsiyalarini bildirish, balki Xarkov va Sumi viloyatlarini egallab olish niyatida ekanini aytib, tahdid qilish uchun ham foydalangan.
Izoh (0)