“Barselona” futbolchisi Lamin Yamal keyingi mavsumdan 10-raqam ostida maydonga tushadi. Bu haqda Managing Barca nashriga tayanib Championat xabar berdi.
17 yoshli futbolchi hozir 19-raqam ostida o‘ynamoqda, ammo Lamin 13-iyul kuni 18 yoshga to‘ladi va kataloniyaliklar bilan uzoq muddatli shartnoma imzolaydi. Shundan keyin futbolchi o‘zining yangi raqamini qabul qilib olishi aytilmoqda. Oldin bu raqamdan Lionel Messi, Ronaldinyo, Diego Maradona kabi futbol afsonalari foydalangan. Hozirda 10-raqam Ansu Fatiga tegishli.
Manbaga ko‘ra, Yamal “Barselona” bilan yangi bitim bo‘yicha kelishuvga erishgan. Unda futbolchini sotib olish uchun belgilangan tovon puli miqdori 1 milliard yevroni tashkil qiladi.
Ma’lumot uchun, Yamal joriy mavsum “Barselona” safida 54 o‘yinida maydonga tushib, o‘z hisobiga 18 ta gol va 25 ta golli uzatma yozdirib qo‘ygan.
Izoh (0)