Самарқанд вилояти Нуробод туманида ички ишлар ходимлари томонидан ҳожатхонадан чақалоқ қутқариб олинди. Бу ҳақда “Ҳудуд” дастурида маълум қилинди.
Айтилишича, соғлиғи ёмонлашиб, қишлоқ врачлик пунктига келган аёл фарзандини дунёга келтирган. Икки соат давомида чуқурликда қолиб кетган чақалоқни ички ишлар ходимлари қутқарган.
“Чақалоқ ҳожатхонага тушиб кетган, яъни онаси туғиб қўйган ҳолати бўйича бордик. Ҳақиқатан ҳам ҳожатхонадан чақалоқ овози эшитилгандан сўнг шеригимиз формасини ечиб, ковлаган еримиздан болани олишга уринди”, дейди ходим.
Чақалоқни қутқариб олган ходимнинг сўзларига кўра, ўша пайтда гўдакнинг қўл-оёқлари ишламаган. Ҳозирда 3,7 кг вазнда туғилган ўғил бола чақалоқ марказий шифохонага олиб борилган, ҳолати қониқарли.
Қайд этилишича, аёл 5-фарзандига ҳомиладор эканини билмаган.
2023 йил апрель охирларида Сирдарё вилояти Сардоба туманида 27 апрель куни 3 киши ҳожатхонада заҳарланиб вафот этганди. Уй эгаси телефони чуқурга тушиб кетгани сабабли отаси ва укасини ёрдамга чақирган. Улар ҳожатхонага тушган вақтда номаълум этиологиялик заҳарланишдан вафот этган.
2024 йилнинг апрель ойида Чиноз туманида 15 ёшли қиз эҳтиётсизлиги оқибатида чуқурга тушиб кетганди.
Май ойида эса Зангиота туманида ҳожатхонага тушиб кетган икки ёшли бола қутқариб олинганди.
Ноябрь ойида Тошкент вилояти, Бўстонлиқ тумани, “Яккатут” маҳалласидаги уйларнинг бирида фуқаро ҳожатхона учун қазилган 5 метрлик чуқурликка тушиб кетганди.
Изоҳ (0)