Чехияда сув тошқини туфайли 21 мингдан ортиқ аҳоли эвакуация қилинди. Бу ҳақда Чехия Ички ишлар вазирлиги раҳбари Вит Ракушан хабар берди.
Сўнгги маълумотларга кўра, тошқинларда беш киши ҳалок бўлган, яна саккиз нафар фуқаро бедарак йўқолганлар рўйхатида.
“Армия вертолётлари ҳудудга 59,4 тонна гуманитар ёрдам етказди. Ҳаммаси бўлиб 21 488 киши эвакуация қилинди, 1 516 киши қутқарилди”, деди Ракушан инқироз штаб-квартираси йиғилишидан сўнг.
Мамлакатда тошқиндан зарар кўрган инфратузилмани тиклаш ишлари давом этмоқда.
13 —18 сентябрь кунлари Чехиянинг деярли бутун ҳудудида узоқ муддатли ёғингарчилик кузатилди. Ноқулай об-ҳаво туфайли 260 мингга яқин уй электр таъминотисиз қолган, автомобиль ва темир йўл участкалари шикастланган.
Чехия президенти Петр Павелнинг сўзларига кўра, тошқиндан зарар кўрган ҳудудларни тиклаш ойлар ёки йиллар давом этиши мумкин. Кучли шамол ва кучли ёмғир Австрия, Венгрия, Руминия ва Словакияда ҳам содир бўлган.
Изоҳ (0)