Фавқулодда вазиятлар вазирлиги қутқарувчилари тоғда жароҳат олган фуқарога амалий ёрдам кўрсатди. Бу ҳақда Тошкент вилояти ФВБ матбуот хизмати хабар берди.
Қайд этилишича, 8 июль куни соат 13:09 да Тошкент вилояти ФВБга Бўстонлиқ тумани “Бурчмулла” маҳалла ҳудудидаги “Қулосой” шаршараси яқинида уч нафар фуқаро сайр қилиш мақсадида бориб, бир нафари ўз эҳтиётсизлиги оқибатида чап оёғидан жароҳат олгани ва ёрдам зарурлиги тўғрисида хабар келиб тушган.
Хабарга асосан, Чимён ёнғин-қутқарув отряди ва Бўстонлиқ тумани фавқулодда вазиятлар бўлимидан бир гуруҳ қутқарувчилар айтилган манзилга етиб бориб, жароҳат олган фуқарога биринчи тиббий ёрдам кўрсатган. Шундан сўнг фуқаролар денгиз сатҳидан 1800 метр баландликдан хавфсиз ҳудудга олиб тушилиб, жароҳат олган фуқаро тез-тиббий ёрдам ходимларига топширилган.
Фуқаронинг умумий аҳволи яхши бўлганлиги сабабли, шифокорлар томонидан яшаш уйига рухсат берилган.
Аввалроқ Бўстонлиқда тоғда адашиб қолган фуқаролар қутқарилгани тўғрисида хабар берилганди. Ундан олдинроқ эса Самарқанд вилояти Ургут туманидаги тоғда йўлдан адашган фуқароларга амалий ёрдам кўрсатилган эди.
Изоҳ (0)