Фарғона вилоятида олти ой аввал таъмирланган автомобиль йўлининг бир қисми ўпирилиб тушди. Вилоят автомобиль йўллари бошқармаси ҳолатга изоҳ берди.
Унга кўра, 23 февраль кунидан 24 февраль кунига ўтар кечаси Фарғона ҳалқаси автомобиль йўлининг Боғдод тумани, “Қахат” МФЙ ҳудудидан ўтган 286-километрида йўлнинг ўнг томонидан оқиб ўтувчи Фарғона каналида сув сатҳи кўпайиб автомобиль йўлининг таг қисмидан сизиб ўтиши натижасида асфалт йўл қопламасида чўкиш юзага келган.
Ҳозирги вақтда мазкур автомобиль йўлининг Қўқон—Фарғона йўналиши бўйича 285-километр ва Фарғона—Қўқон йўналишининг 288-километрларидан вақтинчалик ҳаракат чекланган. Йўлнинг чўккан қисмида таъмирлаш ишлари олиб борилмоқда.
Мазкур автомобиль йўли 2024 йил август ойида жорий таъмирланган. Транспорт воситаси ҳаракат жадаллиги суткасига 30 000-35 000 ташкил этади, ҳаракат вақтинча тўхтатилиб, ташкил этилган автомобиль йўллари 25 км га узайган. 24 февраль куни соат 18:00 га қадар автомобиль йўлида таъмирлаш ишлари якунланиб транспорт воситаларининг ҳаракати йўлга қўйилиши режалаштирилган.
Бундан аввал Тошкент шаҳрида жойлашган “Самарқанд дарвоза” савдо маркази олдида автомобиль йўл қисмида чўкиш юз берган эди. Ҳодиса оқибатида автомобилга етказилган зарар суғурта компанияси томонидан қоплаб бериладиган бўлган.
2024 йил 29 январда ўтказилган видеоселектор йиғилишида давлат раҳбари бу соҳага алоҳида тўхталиб, йўлларни сифатли қуриш, кўчалар бўйида хизматларни ривожлантириш бўйича кўрсатмалар берган эди. Бу борада барча ҳудудларда ишлар бошлаб юборилган.
Изоҳ (0)