Россиянинг Самара вилоятида Ўзбекистон фуқароларини олиб кетаётган автобус ЙТҲга учраши оқибатида 2 киши ҳалок бўлди. Бу ҳақда вилоят ЙҲХБ матбуот хизмати хабар берди.
Маълум қилинишича, воқеа 8 апрель куни соат тахминан 01:00 (Тошкент вақти билан 02:00) да Самаранинг Кинел туманида содир бўлган. Қозоғистонда рўйхатдан ўтган Scania русумли автобус Ўзбекистон фуқароларини Нижний Новгородга олиб кетаётганида ағдарилиб кетган.
Дастлабки маълумотларга кўра, ҳодиса оқибатида икки йўловчи воқеа жойида ҳалок бўлган, яна 10 киши касалхонага ётқизилган.
Хабарда қайд этилишича, ҳайдовчи автобусни йўл ҳаракати хавфсизлигини таъминламайдиган тезликда бошқарган. Айни пайтда ҳодиса жойида тергов-тезкор гуруҳи ишламоқда, полиция ходимлари автоҳалокатнинг барча сабабларини аниқлашда давом этмоқда.
Январь ойида Россиянинг Пенза вилоятида юз берган ЙТҲ оқибатида 7 нафар Ўзбекистон фуқароси ҳалок бўлганди. 3 апрель куни Қозоғистоннинг Ақтўбе вилоятида содир бўлган автоҳалокатда 8 нафар Ўзбекистон фуқароси вафот этди. Уларни жасадлари Мудофаа вазирлигининг махсус самолётида олиб келинди.
Изоҳ (0)