Toshkent shahrida joylashgan “Samarqand darvoza” savdo markazi oldida 2-aprel kuni avtomobil yo‘l qismida cho‘kish yuz bergan edi. Holat yuzasidan “Daryo” muxbiri Veolia Energy Tashkent issiqlik ta’minoti operatori axborot xizmati bilan bog‘lanib izoh oldi.
Aytilishicha, holat issiq suv bosimini tekshirish natijasida yuz bergan. Aniqlangan nosozlik qismi bartaraf etilgan. Shuningdek, o‘pirilib tushgan yo‘l qismi ta’mirlanmoqda.
Qo‘shimcha qilinishicha, hodisa oqibatida avotomobilga yetkazilgan zarar sug‘urta kompaniyasi tomonidan qoplab beriladigan bo‘lgan.
Qurilish va uy-joy kommunal xo‘jaligi vazirligi axborot xizmatining “Daryo”ga ma’lum qilishicha, yuqoridagi kabi holatlarda insonlarga yoki texnik vositalarga zarar yetgan taqdirda o‘sha hududga mas’ul bo‘lgan issiqlik ta’minoti korxonasi javobgar bo‘ladi va nizolar sud tartibida hal etiladi.
Ma’lumot uchun, Toshkent shahrida issiq suv ta’minotini uzmagan holda isitish tarmoqlari gidravlik sinovdan o‘tkazilishi yuzasidan e’lon berilgan.
Unda aytilishicha, 2023-yil 1-maydan boshlab 4 avgustgacha issiqlik tarmoqlarining gidravlik sinovlari o‘tkaziladi (mexanik kuch va zichlik uchun yuqori bosim ostida issiqlik tarmoqlarining sinovlari). Sana va manzillar yuqoridagi havola orqali keltirilgan.
Sinovlar davomida issiqlik tarmoqlari quvurlarining shikastlanishi va issiq suv yo‘llar va yo‘laklarga chiqishi mumkin. Haydovchilar, piyodalar hamda ma’muriy va turar joy binolarida yashovchi fuqarolardan e’tiborli va ehtiyot bo‘lishlari so‘raladi.
Izoh (0)