Сурхондарё вилоятининг Сариосиё туманидаги “Нилу” маҳалласида аёл бошқарувидаги Nexia-3 тик нишабликда йўлдан чиқиб кетиб, ЙТҲ содир бўлди. Натижада рулдаги аёл ва унинг икки нафар фарзанди воқеа жойида вафот этди. Бу ҳақда Сурхондарё вилояти ИИБ Йўл ҳаракати хавфсизлиги бошқармаси ахборот хизмати хабар берди.
Билдирилишича, воқеа 2024 йилнинг 27 март куни соат тахминан 15:40 ларда содир бўлган.
Сариосиё туманининг “Нилу” маҳалласи ҳудудидан ўтувчи 4Р-107 автомобиль йўлининг 21-километрида 1983 йилда туғилган, ҳайдовчилик гувоҳномасига эга бўлмаган аёл Nexia-3 автомобилини Сангардак—Денов йўналишида бошқариб келиб, тезликни меъёридан ошириши оқибатида тик нишабликда бошқарувни йўқотган. Йўлдан чиқиб кетган автомобиль бетон тўсиққа урилган. Йўл-транспорт ҳодисаси ортидан автомобилда ёнғин юзага келган, — дейилади бошқарма ахборот хизмати хабарида.
Таъкидланишича, мазкур ЙТҲ ҳамда ёнғин натижасида автомобиль ҳайдовчиси ва унинг икки нафар вояга етмаган фарзанди воқеа жойида вафот этган.
Шунингдек, автомобилда бўлган ҳайдовчининг яна бир нафар фарзанди ҳамда яқин қариндоши (автомобиль эгаси) оғир тан жароҳати билан шифохонага ётқизилган, — дейди масъуллар.
Бошқарма ахборот хизмати фуқаролардан ҳайдовчилик гувоҳномасига ёки етарлича малакага эга бўлмай туриб автомобиль бошқармасликни сўраган.
Изоҳ (0)