“Дарё” нашри 25 январда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Россия Украинанинг қўшиб олинган ҳудудларида ахлоқ тузатиш колонияларини қуради. У ерга украиналик асирлар жойлаштириладими?
Россия Федерал Жазони ижро этиш хизматига (FSIН) уруш бошланганидан кейин қўшиб олинган Украина ҳудудларида 24 та ахлоқ тузатиш колонияларини яратиш вазифаси топширилди. Бу ҳақда Россия ҳукуматининг тегишли фармойишида айтилган.
Ўзини ўзи республика деб эълон қилган Донецк халқ республикасида 12 та, Луганск халқ республикасида еттита, Херсон вилоятининг Россияга қўшиб олинган қисмида учта, Запороже вилоятининг қўшиб олинган қисмида эса иккита ахлоқ тузатиш колонияси (ва битта колония-турар жой) ташкил этиш режалаштирилган.
Бундан ташқари, Россия ҳукумати режасига кўра, бу ҳудудларда учта даволаш тузатиш муассасаси ва учта ахлоқ тузатиш маркази ҳам ташкил этилади.
2022 йил ноябрь ойида Алексей Навалний жамоасининг “Сирен” нашри Украинанинг Херсон вилоятидан чекиниш пайтида россиялик ҳарбийлар украиналик асирларни Россия ҳудудидаги 10 та колонияга олиб кетгани ҳақида хабар берганди.
Туркия НАТОдан чиқадими? Бугун мана шу масала очиқланди
Анқара Шимолий Атлантика алянси (НАТО)дан чиқиш эҳтимолини кўриб чиқмаяпти. Бу ҳақда Туркия президенти Ражаб Тоййиб Эрдўғон раислигидаги Адолат ва тараққиёт партияси матбуот котиби Ўмер Челик 25 январь куни маълум қилди.
“Ҳар сайловда бундай ҳолатларга (Туркияни НАТОдан чиқариш чақириқларига — “Дарё” изоҳи) дуч келамиз. Булар бизни хавотирга соладиган нарсалар эмас. Туркияни НАТОдан чиқариш кераклиги ҳақида гапираётганларнинг сўзларида асос йўқ. Бу ҳақда гап бўлиши ҳам мумкинмас. Биз НАТОга асос солган давлатлардан биримиз. Улар бу ҳақда гапиришга ҳақли эмас”, — деди Челик CNN Турк телеканалига берган интервьюсида.
25 январь куни эрталаб Туркиянинг “Ватан” партияси раиси ўринбосари Этҳем Санжак Туркия Анқарага қарши провокацион ҳаракатлар туфайли 5—6 ой ичида НАТОни тарк этиши мумкинлигини айтганди. Унинг сўзларига кўра, сўнгги сўровлар Туркия аҳолисининг камида 80 фоизи “АҚШ Туркияга нисбатан энг душманона ва бузғунчи сиёсат олиб бораётган давлат” эканига ишонч билдирган. Сиёсатчи “сўнгги пайтларда турк халқи Россия ва Владимир Путинга ҳамдард бўла бошлаганини” таъкидлади.
Владимир Зеленский Жиноят кодексига тузатишлар киритишни маъқуллади. Ҳуқуқ ҳимоячилари нима сабабдан ушбу қонун лойиҳасидан норози?
Украина президенти Владимир Зеленский Жиноят кодексига тузатишлар киритишни маъқуллади.
Олий Рада сайтида хабар қилинишича, 13 январь куни депутатлар томонидан қабул қилинган ҳужжатга президент имзо чеккан.
Украина Жиноят кодексига киритилган ўзгартиришларга кўра, қўмондонга бўйсунмаслик, буйруққа риоя қилмаслик, қўмондонга таҳдид ёки зўравонлик қилиш, ҳарбий қисмни ва жанг майдонини рухсатсиз ташлаб кетишда айбланган ҳарбий хизматчиларга судлар жазони қисқартириш ёки шартли жазо тайинлаш ҳуқуқига эга бўлмайди. Бундан ташқари, маъмурий ҳуқуқбузарликлар, масалан, ҳарбийларнинг спиртли ичимлик ичиши учун жазо муддати оширилади.
Ушбу қонун лойиҳаси ҳали қабул қилинмасдан туриб ҳуқуқ ҳимоячилари томонидан танқидга учраганди, у ҳарбийларнинг асосий ҳуқуқлари суд томонидан ҳимояланишини сезиларли даражада чеклайди, деб ҳисобланмоқда. Ўзгартиришларга қарши петиция бир кунда 25 000 дан ортиқ овоз олган, бу эса уни қайта кўриб чиқишга мажбур қилади.
Ўзбекистонда вазирлик ва идоралар аниқ белгиланган 16 та йўналишда ишлайди, эндиликда ташкилот ходимларининг умумий чекланган сони ҳам белгиланди
Ўзбекистонда ҳар бир вазирлик ва идора ўз фаолиятини тизим ташкиллаштириш мақсадида 16 та йўналиш бўйича таклифларни ўз ичига олган президент ҳужжати лойиҳасини киритади.
Ҳужжат лойиҳасида: фуқароларнинг тизимли муаммоларини ҳал этиш, бюджет маблағларидан тўғри фойдаланиш, давлат харидлари шаффофлигини ошириш, шунингдек, тадбиркорлик субъектлари учун тенг имкониятлар яратиш орқали давлат харидлари жараёнида рақобатни ривожлантириш;
- 2023 йилдан бошлаб вазирлик ва идораларининг айрим функцияларини босқичма-босқич хусусий секторга ўтказиш;
- тадбиркорлик фаолиятини ривожлантириш ҳамда аҳолини ижтимоий қўллаб-қувватлаш тизимини такомиллаштириш;
- ташкилотлар кесимида коррупсион ҳолатлар билан курашиш
- иш жараёнини рақамлаштириш ва қайта тикланувчи энергия манбаларини кенг жалб қилиш амалиётлари киритилди.
Шунингдек президент фармони билан вазирлик ва идораларда ходимларнинг умумий чекланган сони белгиланди.
Фармонга мувофиқ, вазирлик ва идораларнинг нобюджет маблағларидан қўшимча бошқарув штатларни киритиш қатъий тақиқланмоқда.
Айни пайтда ҳукуматга бўйсунадиган мустақил вазирлик ва идоралар сони жами 26 та этиб белгиланмоқда (улар таркибига кирган барча қўмиталар, агентликлар ва инспекциялар билан бирга жами 69 та) шу жумладан:
- вазирликлар — 21 та;
- қўмиталар — 12 та, шундан 2 таси мустақил мақомга эга;
- агентликлар — 25 та, шундан 3 таси мустақил мақомга эга;
- инспекциялар — 11 та.
Қолаверса, вазирлик ва идораларнинг марказий аппаратлари ва ҳудудий бўлинмаларининг тузилмаларини шакллантириш бўйича ягона талаблар ҳам тасдиқланмоқда.
Изоҳ (0)