“Уларни ўзларини тўлиқ ҳимоя қилиш имкони бўлмаган ҳолда судга олиб кетишган” — Адвокат Комил Алламжонов атрофидаги фуқароларга бўлган босим ҳақида гапирди

Комил Алламжонов атрофидаги етти нафар фуқаронинг номи судда оқланди. Уларнинг 15 кунлик ҳибсга олиниши ноқонуний деб топилди.

Ўзбекистон Олий суди Комил Алламжоновга суиқасд уюштирилган кечада унинг атрофида бўлган шахсларнинг қонунбузарликларини исботловчи далиллар етарли эмаслиги сабаб суд қарорларини бекор қилди.

Гап Жиноят кодексининг 183-моддаси (майда безорилик) ва 194-моддаси 1-қисми (Ички ишлар органларининг талабларини бажармаслик) билан қамоққа олинган Б.Ёқубов, С.Сидиқов, А.Қурбонмуродов, А.Ташов, А.Салимов, Ж.Турғунов ва Х.Зуфаров ҳақида бормоқда.

ЎзА ахборот агентлигига берган интервьюсида жабрланувчиларнинг адвокати Даврон Саидов 26 октябрь куни унинг мижозлари тезкор-тергов гуруҳи ихтиёрида бўлганини айтди. Кечқурун уларни Қибрай тумани ИИБга чақириб, айрим ҳужжатларга имзо чекишни сўраган.

“Улар буни қилишдан бош тортганларида, ўзларини тўлиқ ҳимоя қилиш имкони бўлмаган ҳолда судга олиб кетишди”, дея қўшимча қилди адвокат.

Олий суд матбуот котиби Азиз Обидовнинг баёнотига кўра, Ўзбекистон Олий суди етти нафар фуқаронинг шикоятини ревизион тартибида кўриб чиқди.

Натижада маъмурий ҳуқуқбузарлик фактини тасдиқловчи далиллар етарли бўлмагани учун Олий суд етти нафар фуқарога нисбатан илгари қабул қилинган суд қарорларини бекор қилиш тўғрисида қарор чиқарди. Маъмурий жавобгарлик тўғрисидаги кодекснинг 271-моддаси 1-банди асосида иш тугатилди.

Бундан ташқари, иш юзасидан суриштирув ҳаракатларини олиб боришда ҳуқуқбузарлик ҳодисасини тасдиқловчи далилларни тўплаш чораларини кўрмаган ИИБ ходимига нисбатан Ички ишлар вазирлигига, шунингдек, ишни судда кўриб чиқишда ҳуқуқбузарлик ҳодисасини тасдиқловчи далиллар етарли эмаслигига эътибор бермаган судьяларга нисбатан Судьялар малака ҳайъатига хусусий ажримлар чиқариш йўли билан муносабат билдирилди.