АҚШ президенти маъмурияти Жанубий Кореядан 4,5 минг нафар ҳарбийни олиб кетмоқчи. Бу ҳақда Пентагоннинг муҳокамадан хабардор вакилларига таяниб The Wall Street Journal хабар берди.
Маълум қилинишича, Жанубий Корея ҳудудида жами 28,5 мингга яқин АҚШ ҳарбийлари бор. Расмийлар қўшинларни Тинч океанига, жумладан, Гуам оролига кўчириш вариантларини кўриб чиқмоқда. Ташаббус Шимолий Кореяга қарши кураш сиёсати доирасида муҳокама қилинмоқда. Пентагон вакили Пит Нгуеннинг айтишича, АҚШ президенти Шимолий Кореяни “тўлиқ ядросизлантириш” ғоясига содиқ.
Икки амалдорга кўра, таклиф ҳали Америка президентига кўриб чиқиш учун келиб тушмаган. Ҳозирча у муҳокама босқичида. Президент Дональд Трамп апрель ойи бошида Европада жойлаштирилган АҚШ ҳарбий контингенти сони қисқариши мумкинлигини айтганди. NBC нашри эса АҚШ Европадан 10 минггача ҳарбийни олиб чиқиб кетиш имкониятини кўриб чиқаётганини хабар қилганди.
Америка расмийлари таъкидлашича, Украинадаги можаро қайси йўналишда кечиши ва Трамп маъмурияти Киевни ҳарбий қўллаб-қувватлашда давом этиши аниқ бўлмагунча, қўшинлар сони бўйича қарор қабул қилинмайди.
АҚШнинг хориждаги энг йирик Кемп Хамфрис ҳарбий базаси Пхентек шаҳрида (Жанубий Корея) жойлашган. Бошқа йирик базаларга Кунсан ва Осан авиабазалари киради. Бу базаларда АҚШ армияси ва ҳарбий-ҳаво кучларининг турли бўлинмалари жойлашган. Улар минтақанинг мудофааси ва хавфсизлигига ҳисса қўшади.
Изоҳ (0)